Тўқсон ёш ижодга тўсиқ эмас
Вилоят Матбуот уйида ижод аҳли учун ноодатий, ўзига хос ва самимий руҳда кечган учрашув бўлиб ўтди. Бу сафар нафақат китоб муаллифи, балки унинг қаҳрамони ҳам иштирок этгани тадбирга алоҳида аҳамият ва руҳ бағишлади.
Таниқли журналист, ёзувчи ва таржимон Янгибой Қўчқоров ўзининг “Катта хонадон қиссалари” китоби билан самарқандлик китобхонлар ёнига келди. Мазкур китобга муаллифнинг турли йилларда ёзилган эсселари, бадиий-публицистик суҳбатлари, қалбдан чиққан мактуб ва мулоҳазалари киритилган бўлиб, улар ижодкорнинг ҳаёт тажрибаси, кузатишлари ва фалсафий қарашларини ёрқин намоён этади.
Учрашув давомида Янгибой Қўчқоров китобнинг яратилиш тарихи, унга туртки бўлган воқеалар ва диққатга молик қаҳрамонлар ҳақида сўз юритди. Муаллифнинг самимий мулоҳазалари тадбир иштирокчиларида катта қизиқиш уйғотди.
Эътиборлиси, тадбир меҳмонлари орасида китоб қаҳрамони - “Зиндондан нидо”, “Амал ҳавоси”, “Катта хонадон”, “Мардикорнинг севгиси” каби китоблар муаллифи, таниқли адиб Муҳаммад Салом ҳам бор эди. Тўқсон ёш билан юзлашган, теран фикрли, баркамол қалам соҳибининг Бухородан келиб, учрашувда иштирок этгани ижод аҳли учун ҳақиқий ибрат намунаси бўлди.
- Ижодимнинг катта қисмини Бухоро вилояти далаларидаги шўрланиш муаммосини ёритишга бағишлаганман, - деди Муҳаммад Салом. - Бу офатга қарши кураш йўлларини мутахассислар билан бирга илмий асосда таклиф қилдик. Бироқ барча раҳбарлар ҳам бу фикрларни қўллаб-қувватламади. Ярим аср давомида шу сабабли ижодимга етарлича эътибор берилмади. Жасоратли ҳамкасбим Янгибой Қўчқоров мен билан суҳбат қургач, бу ҳақда китоб ёзишга қарор қилди. Мана шу хурсандчиликни менга қўл тутиб, ижод йўлида руҳ берилган зиёлилар шаҳри — Самарқанд билан баҳам кўришни истадим.
- Адибнинг асарларини ёшлигимизданоқ иштиёқ билан ўқиганмиз, - дейди Ўзбекистонда хизмат кўрсатган маданият ходими, шоира Хосият Бобомуродова. - Бугунга келиб ҳам қалами қўлдан тушмагани, ижоддан чарчамагани, бу, аввало, руҳнинг поклиги ва ҳаётга меҳрдан далолат.
Шу каби самимий учрашувлар Самарқанднинг бир неча олий ўқув юртларида ташкил этилди. СамДУда ўтказилган тадбирда ректор Рустам Холмуродов Муҳаммад Салом ҳамда Янгибой Қўчқоровнинг ижодини қадрлаши, яна мазмунга бой китоблар ёзишларини айтиб, уларга ижодий баркамоллик тилади.
Гулруҳ Мўминова.
