To‘qson yosh ijodga to‘siq emas
Viloyat Matbuot uyida ijod ahli uchun noodatiy, o‘ziga xos va samimiy ruhda kechgan uchrashuv bo‘lib o‘tdi. Bu safar nafaqat kitob muallifi, balki uning qahramoni ham ishtirok etgani tadbirga alohida ahamiyat va ruh bag‘ishladi.
Taniqli jurnalist, yozuvchi va tarjimon Yangiboy Qo‘chqorov o‘zining “Katta xonadon qissalari” kitobi bilan samarqandlik kitobxonlar yoniga keldi. Mazkur kitobga muallifning turli yillarda yozilgan esselari, badiiy-publitsistik suhbatlari, qalbdan chiqqan maktub va mulohazalari kiritilgan bo‘lib, ular ijodkorning hayot tajribasi, kuzatishlari va falsafiy qarashlarini yorqin namoyon etadi.
Uchrashuv davomida Yangiboy Qo‘chqorov kitobning yaratilish tarixi, unga turtki bo‘lgan voqealar va diqqatga molik qahramonlar haqida so‘z yuritdi. Muallifning samimiy mulohazalari tadbir ishtirokchilarida katta qiziqish uyg‘otdi.
E’tiborlisi, tadbir mehmonlari orasida kitob qahramoni - “Zindondan nido”, “Amal havosi”, “Katta xonadon”, “Mardikorning sevgisi” kabi kitoblar muallifi, taniqli adib Muhammad Salom ham bor edi. To‘qson yosh bilan yuzlashgan, teran fikrli, barkamol qalam sohibining Buxorodan kelib, uchrashuvda ishtirok etgani ijod ahli uchun haqiqiy ibrat namunasi bo‘ldi.
- Ijodimning katta qismini Buxoro viloyati dalalaridagi sho‘rlanish muammosini yoritishga bag‘ishlaganman, - dedi Muhammad Salom. - Bu ofatga qarshi kurash yo‘llarini mutaxassislar bilan birga ilmiy asosda taklif qildik. Biroq barcha rahbarlar ham bu fikrlarni qo‘llab-quvvatlamadi. Yarim asr davomida shu sababli ijodimga yetarlicha e’tibor berilmadi. Jasoratli hamkasbim Yangiboy Qo‘chqorov men bilan suhbat qurgach, bu haqda kitob yozishga qaror qildi. Mana shu xursandchilikni menga qo‘l tutib, ijod yo‘lida ruh berilgan ziyolilar shahri — Samarqand bilan baham ko‘rishni istadim.
- Adibning asarlarini yoshligimizdanoq ishtiyoq bilan o‘qiganmiz, - deydi O‘zbekistonda xizmat ko‘rsatgan madaniyat xodimi, shoira Xosiyat Bobomurodova. - Bugunga kelib ham qalami qo‘ldan tushmagani, ijoddan charchamagani, bu, avvalo, ruhning pokligi va hayotga mehrdan dalolat.
Shu kabi samimiy uchrashuvlar Samarqandning bir necha oliy o‘quv yurtlarida tashkil etildi. SamDUda o‘tkazilgan tadbirda rektor Rustam Xolmurodov Muhammad Salom hamda Yangiboy Qo‘chqorovning ijodini qadrlashi, yana mazmunga boy kitoblar yozishlarini aytib, ularga ijodiy barkamollik tiladi.
Gulruh Mo‘minova.
