Украинадаги вазият: Украина қарши ҳужуми бошланганми? Россия Украина Қуролли Кучлари фронт чизиғидан ёриб ўтганини рад этади
Россия Украина шаҳарларини ўққа тутишда давом этмоқда ва Украина Қуролли Кучларининг фронт чизиғининг турли қисмларида муваффақиятга эришгани ҳақидаги маълумотни рад этмоқда.
Запорожьеда ҳаво ҳужуми сиреналари тўхтамайди. Маҳаллий ҳукумат маълумотларига кўра, рус қўшинлари бир кун ичида минтақага 70 марта ҳужум қилган. Турар-жой биноларининг ўққа тутилиши натижасида камида 8 киши жароҳатланган.
Россия мудофаа вазирлиги Украина қўшинларининг фронтнинг турли соҳаларида муваффақиятга эришгани ҳақидаги хабарлардан сўнг Запорожье ва Херсон вилоятларида фаол ҳарбий ҳаракатлар ҳақидаги маълумотларни рад этди. Шу билан бирга, Россия Украинанинг Донецк йўналишидаги бир неча ҳужумларини қайтарганини даъво қилмоқда.
Аввалроқ Владимир Зеленский Украина қўшинларининг эълон қилинган қарши ҳужумини кейинга суришга тўғри келишини, чунки Украинага барча ҳарбий техника ҳали етиб келмаганини айтган эди.
Украина қарши ҳужуми бошланганми?
Украина Қуролли кучларининг қарши ҳужуми бошланганми ёки йўқми, ҳозирча айтиш қийин. Қарама-қарши маълумотлар ҳар икки томондан тарқатилмоқда.
Москва ва Киевдан келаётган бир бирига зид маълумотлар фонида ноаниқлик ҳукм сурмоқда. Украина президенти Владимир Зеленский пайшанба куни BBCга берган интервьюсида унга қарши ҳужум қилиш учун ҳали вақт ва қурол кераклигини айтган.
Ўз навбатида, Россия қўмондонлиги пайшанба куни ўз қўшинлари Соледар ҳудудида 95 километрлик фронтда украиналик қўшинларнинг 26 та ҳужумини қайтарганини маълум қилган.
Бахмут яқинидаги вазиятга келсак, Украина жума куни бу шаҳар атрофидаги ҳудудларни қайтариб олганини эълон қилган. ЧВК Вагнер раҳбари Евгений Пригожин бу маълумотни билвосита тасдиқлаб, Россия мунтазам қўшинлари қочиб кетаётгани ва бу мудофаанинг қулашига олиб келишини айтган.
Шунингдек Пекиндан душанба куни Киевга юқори мартабали вакил юборилиши, у Москвага боришдан олдин Европани кезиб чиқиши ҳақида ҳам хабар тарқалмоқда.
