“Dinamo” Superligaga qanday tayyorgarlik ko‘rdi?
“Dinamo” jamoasi Superliga yangi mavsumi oldidan Toshkentdagi yig‘inda mahalliy klublarga qarshi nazorat uchrashuvlarida maydonga tushgan bo‘lsa, Saudiya Arabistoni va Turkiyada o‘quv-mashg‘ulot yig‘inlarida Saudiya Arabistoni, Rossiya, Gruziya, Qatar, Latviya va Qozog‘iston klublari bilan o‘rtoqlik uchrashuvlarini o‘tkazdi. Shu bilan birga, yig‘in doirasida tarkibni kuchaytirish maqsadida jamoaga mahalliy va legioner futbolchilar ham jalb qilindi.
Jumladan, mahalliy klublardan Humoyunmirzo Iminov, Damir Temirov, Farrux Ikromov, Xislat Xalilov, Sanjar Shoahmedov, Husniddin G‘ofurov, Odiljon Abdumajidov, Vladimir Kozak, Anvar Hojimirzayev hamda belaruslik Artyom Sokol, ganalik Emmanuyel Yagr, braziliyalik Jurani Fransisko Ferreyra kabi legioner futbolchilar bilan shartnoma imzolangan. Ganalik ikki legoner hujumchi Kojo Joel va yarim himoyachi Fransis Narx jamoa tarkibida o‘tgan mavsumdan buyon to‘p surmoqda.
“Dinamo” Superliganing ilk turida Namanganda “Navbahor”ga qarshi maydonga tushadi. Jamoa bosh murabbiyi Vadim Abramov mavsumga tayyorgarlik va Superliga starti oldidan fikrlarini bildirdi.
- Oxirgi o‘quv-mashg‘ulot yig‘inni Turkiyada o‘tkazdik va bir nechta o‘rtoqlik uchrashuvlarida maydonga tushdik, hammasi yaxshi o‘tdi, - deydi V.Abramov. – Seleksiya ishlaridan qoniqdim, kimni jamoaga olib kelish mumkin bo‘lsa, jalb qildik. Bu tanlov qanchalik to‘g‘ri bo‘lgani esa o‘yinda aniq bo‘ladi. Mavsum oldidan maqtanishga erta, lekin muxlislarni xursand qilish uchun harakat qilamiz. Superliga starti oldidan so‘nggi o‘rtoqlik uchrashuvini “Andijon” klubiga qarshi o‘tkazdik. O‘yinda hisob ochilmagan bo‘lsa-da inobatga olish kerak bo‘lgan jihatlarga e’tibor qaratdik. Namangandagi ilk uchrashuv qiziqarli bo‘ladi. To‘g‘ri, “Navbahor” ikkita rasmiy uchrashuvda maydonga tushgani uchun kichik ustunlik bor, ammo futbolchilar yaxshi o‘yin ko‘rsatsa, raqibning kimligi ahamiyatsiz.
“Dinamo” 1 mart kuni ilk turni safarda “Navbahor”ga qarshi o‘tkazsa, ikkinchi turda Jizzaxda “Neftchi” bilan o‘ynaydi, uchinchi turda esa Olmaliqda OKMK mehmoni bo‘ladi.
