“Omikron” shtammi “delta”ga nisbatan tez va oson yuqadi

Yapon olimlari COVID-19ning “omikron” shtammi “delta” variantiga nisbatan 4,2 barobar yuqumliroq, degan xulosaga kelishdi. 

Bunga Janubiy Afrika Respublikasi Gauteng provinsiyasi aholisidan olingan koronavirusning genom ma’lumotlari tahlili asos bo‘ldi. 

Aniqlanishicha, “omikron” tez va oson yuqadi. Shunga qaramay, yangi mutatsiya tufayli gospitalizatsiya darajasi yuqori emas. Bu “omikron”ni yuqtirganlarda xastalik nisbatan yengilroq o‘tayotganini anglatadi. 

Yapon olimlarining bu xulosalari hozircha xalqaro ilmiy doiralar tomonidan o‘rganilib, tasdiqlangani yo‘q. 

Shuningdek, avvalroq Rossiyada Janubiy Afrika Respublikasida bo‘lib qaytgan ikki nafar fuqaroda "omikron" shtammi aniqlangani haqida xabar bergan edik. 

Sog‘liqni saqlash vaziri Mixail Murashko kecha ushbu bemorlar ahvoli haqida ma’lumot berib, kasallik har ikkisida ham yengil o‘tayotganini ta’kidladi. 

Qolaversa, rossiyalik virusolog olim Pyotr Chumakov yangi shtamm haqidagi o‘z xulosalarini e’lon qildi. Uning aytishicha, ushbu mutatsiyadan himoyalanish uchun organizm Uxanda aniqlangan koronavirus shtammiga qiyoslaganda, 41 barobar ko‘p antitanachalar hosil qilishi zarur. 

"Kasallikning emlanmagan, immuniteti past hamda vaksina olganiga uzoq vaqt bo‘lgan odamlarga yuqish xavfi yuqori", deydi olim.