Ona – mo‘’tabar, ayol - muhtaram
Boychechak bo‘y ko‘rsatib, yuraklarda bahor zavqi kechayotgan, yasharish, yangilanish faslining ilk kunlarida 8 mart - Xalqaro xotin-qizlar kunining nishonlanishida o‘ziga xos ramz borday. Ayolda ham tabiatan yaratuvchanlik mujassam. U shu xususiyatlari bilan oilasini yashnatadi, jamiyat rivojiga hissa qo‘shadi.
Joriy yilda mazkur bayram mamlakatimizning barcha hududlarida bo‘lgani singari viloyatimizda ham yuksak tayyorgarlik bilan nishonlanmoqda. Bahor kirib kelishi bilanoq ijtimoiy himoyaga muhtoj xotin-qizlar uchun bayram tadbirlari, konsert dasturlari namoyish etildi, keksa onaxonlar holidan xabar olindi.
Samarqandning faol xotin-qizlari, faxriy onaxonlar, keng jamoatchilik ishtirokida o‘tkazilgan bayram tantanalarida viloyat xotin-qizlariga ehtirom ko‘rsatildi.
Unda viloyat hokimi Erkinjon Turdimov so‘zga chiqib, yig‘ilganlarni, ularning timsolida viloyatning barcha xotin-qizlarini bayram bilan qutlab, iliq tilaklarini bildirdi.
-Ayol siymosida avvalo, mehribon ona, munis opa-singillar, jajji qizlarimiz ko‘z oldimizga keladi, - dedi viloyat hokimi o‘z so‘zida. - Hayotimizni opa-singillarimizning oila va jamiyatdagi faol ishtirokisiz tasavvur etib bo‘lmaydi. Bugun viloyatda sanoat, iqtisod, qishloq xo‘jaligi, savdo, xalq ta’limi, madaniyat, san’at va boshqa sohalarda jami besh ming nafarga yaqin ayollar rahbarlik lavozimlarida faoliyat ko‘rsatib kelmoqda. O‘zbekiston Respublikasi Oliy Majlisi Qonunchilik palatasiga 2 nafar viloyat kengashiga 22 nafar, tuman, shahar kengashlariga 130 nafar ayollar deputat bo‘lib saylandi. Kattaqo‘rg‘on shahriga G.Alimovaning hokim etib tayinlanishi ham jamiyatimizda ayolning mavqeini ko‘tarishga qaratilgan e’tibor natijasidir.
Ammo ayolni himoya qilish, zarur bo‘lsa, ularga yordam ko‘rsatish ham bizning oldimizdagi eng muhim masalalardan biridir. Onalik va bolalikni muhofaza qilish, yordamga muhtoj bo‘lgan va og‘ir ahvolga tushib qolgan ayollarga manzilli yordam ko‘rsatish, ularning har tomonlama to‘kis, baxtli hayot kechirishiga yetarli shart-sharoitlar yaratish, oila poydevorini yanada mustahkamlash bo‘yicha ham qator ishlar olib borilyapti.
Bayram tadbirida turli jabhalarda faoliyat yuritayotgan, o‘z mehnati, iste’dodi, qobiliyati bilan jamiyatda munosib o‘rniga ega bir guruh ayollarga ehtirom ko‘rsatildi.
- Nurobod tumanining “Kattaqo‘rg‘on” shirkat xo‘jaligida cho‘ponman, - deydi viloyat hokimligi faxriy yorlig‘i bilan taqdirlangan Mohiba Berdiyorova. – Quloqqa biroz g‘alati eshitiladi. Ammo turmush o‘rtog‘im vafot etgach, farzandlarimning kamoli uchun u kishining ishlarini davom ettirdim. 10 yildan buyon chorvachilik bilan shug‘ullanaman. 5 nafar farzandimni halol mehnat qilib tarbiyaladim. Shunday yillar bo‘ldiki, 3 ming dasta yontoqni qishga g‘amlash uchun o‘zim dastaladim. Mana mehnatlarimning rohatini ko‘rib, qalbim faxrga to‘ldi.
Shuningdek, viloyatimizda bir guruh ayollar “Mo‘’tabar ayol” ko‘krak nishoni bilan taqdirlandi.
- 37 yildan buyon bolalarga ingliz tilidan saboq beraman, - deydi Urgut tibbiyot kolleji ingliz tili fani o‘qituvchisi Sayyora Botirova. – Bugun viloyatimizning faol ayollari sifatida e’tirof etilganimdan xursandman. Bu bizni yanada kuch-g‘ayrat va shijoat bilan ishlashga, malakali kadrlar tayyorlashga, ularni jamiyatning faol a’zosi qilib tarbiyalashga da’vat etadi.
Elimiz ardog‘idagi san’atkorlarning chiqishlari davraga yanada ko‘tarinki ruh bag‘ishladi. Ayollarimiz yuzidagi tabassum, quvonch ularning bu kunlarga shukronaligi belgisi edi.
Nasiba JONTO‘RAYeVA.
