Pokistonda terror to‘lqini
18 sentyabrda sodir etilgan terakt Pokiston kuch ishlatar tuzilmalarining zaifligini yaqqol namoyon etib, Afg‘oniston bilan chegaradagi inqirozni yangi, keskin bosqichga olib chiqdi.
Koxat shahridagi politsiya majmuasiga «Tehrik-i Tolibon Pokiston» (TTP) jangarilari tomonidan uyushtirilgan keng ko‘lamli hujum mintaqadagi xavfsizlik dinamikasiga yangicha nazar bilan qarashga majbur qilmoqda. Hodisa TTP yaxshi qo‘riqlanadigan davlat ob’yektlariga qarshi murakkab va muvofiqlashtirilgan operatsiyalarni amalga oshirish qobiliyatiga ega ekanini ko‘rsatdi.
Politsiya majmuasi darvozasi oldida xudkush avtomobil portlatilganidan so‘ng qurollangan jangarilar guruhi hujumga o‘tgan. Bunday kombinatsiya — TTPga xos taktik usullardan biri bo‘lib, maksimal psixologik ta’sir ko‘rsatish va mudofaa tizimini izdan chiqarishga qaratilgan.
Pokiston xavfsizlik kuchlari otishma davomida olti nafar hujumchini yo‘q qilgan bo‘lsa-da, dastlabki zarba o‘z maqsadiga erishdi. 30 dan ortiq kishi, jumladan, 15 nafar politsiya xodimi halok bo‘lgan, qariyb 80 kishi yaralangan.
Fojianing asosiy tahlili Islomobod va Kobul o‘rtasidagi ikki tomonlama munosabatlarga borib taqaladi. Pokiston hukumati TTP rahbariyati va uning mashg‘ulot lagerlari Afg‘oniston hududida joylashgani, guruh Kobulning sustligi yoki Afg‘oniston hokimiyatining chekka hududlar ustidan nazoratni ta’minlay olmayotgani sharoitida faoliyat yuritayotganini uzoq vaqtdan buyon izchil ravishda ta’kidlab keladi.
Kobul esa bu ayblovlarni qat’iyan rad etadi. Bu holat muntazam ravishda diplomatik noroziliklar va chegaraoldi hududlardagi mahalliy to‘qnashuvlarga olib kelmoqda.
Koxatdagi terakt qisqa muddatda munosabatlarni normallashtirish istiqboliga jiddiy zarba berdi. Islomobod Afg‘oniston hokimiyatining aralashmasligini to‘g‘ridan-to‘g‘ri yordam sifatida qabul qilmoqda. Bu esa Pokiston rahbariyatini yanada keskin, hatto chegara ortida kuch ishlatishga qaratilgan javob choralariga undashi mumkin.
Tahlilchilarga ko‘ra, Koxatdagi terakt siyosiy stavkalarni keskin oshirdi. Pokiston jamoatchiligi va armiya rahbariyati qat’iy qasos choralarini talab qilishi mumkin, bu esa Islomobod uchun har qanday murosani ichki siyosiy nuqtai nazardan o‘ta murakkab qarorga aylantiradi. Bunday sharoitda Turkiya va Qatarning vositachilik missiyasi o‘z yakuniga yetib, uning o‘rnini harbiy qarama-qarshilik egallashi xavfi mavjud.
Kuzatuvchilarning fikricha, agar Islomobod TTPning Afg‘onistondan keladigan ta’minot kanallarini samarali ravishda to‘sish yo‘lini topa olmasa, Pokistonning shimoli-g‘arbiy qismi uzoq davom etadigan va qonli toliqtirish urushiga botib qolishi mumkin.
