Prezident Murojaatnomasi — Yangi O‘zbekiston taraqqiyotining yangi bosqichi
Shavkat Mirziyoyevning Oliy Majlis va O‘zbekiston xalqiga yo‘llagan navbatdagi Murojaatnomasi mamlakatimiz taraqqiyotida yangi, mas’uliyatli va hal qiluvchi bosqichni boshlab berdi.
Ushbu Murojaatnoma Yangi O‘zbekistonni barpo etish yo‘lida amalga oshirilayotgan keng ko‘lamli islohotlarning mantiqiy davomi bo‘lib, erishilgan yutuqlar bilan bir qatorda kelgusidagi ustuvor vazifalarni aniq belgilab berdi.
Murojaatnomada jamiyat hayotida mahallaning o‘rni va nufuzini yanada oshirish, ijtimoiy adolatni ta’minlash, kambag‘allikni qisqartirish, aholi farovonligini yuksaltirish masalalariga alohida e’tibor qaratildi. Shu bilan birga, iqtisodiyotni innovatsion asosda rivojlantirish, ta’lim tizimini takomillashtirish hamda inson kapitaliga investitsiyalarni ko‘paytirish davlat siyosatining muhim yo‘nalishlari sifatida belgilab berildi.
Murojaatnomada qonun chiqaruvchi hokimiyat va mahalliy Kengash deputatlarining jamiyat hayotidagi o‘rni va mas’uliyatini yanada oshirish masalasiga ham alohida urg‘u berildi. Davlat rahbari deputatlar faoliyati xalq bilan yaqin muloqotga, joylardagi muammolarni o‘z vaqtida aniqlash va ularga yechim topishga qaratilgan bo‘lishi zarurligini ta’kidladi. Bu esa deputatlarning faqat qonun ijodkorligi bilan cheklanib qolmasdan, aholi manfaatlarining haqiqiy himoyachisi sifatida faol ish olib borishini taqozo etadi.
Xususan, 2026 yilning “Mahallani rivojlantirish va jamiyatni yuksaltirish yili” deb e’lon qilinishi deputatlar zimmasiga yanada katta mas’uliyat yuklamoqda. Chunki mahallada amalga oshirilayotgan islohotlar, ijtimoiy dasturlar va davlat loyihalarining samaradorligi ko‘p jihatdan mahalliy Kengash deputatlarining tashabbuskorligi, nazorati va faol pozitsiyasiga bog‘liq.
Murojaatnomada ilgari surilgan tarixiy tashabbus — Mustaqil O‘zbekiston tarixida ilk bor kosmik sohada sun’iy yo‘ldoshni uchirish rejasining e’lon qilinishi mamlakatimiz ilm-fani va texnologiyalari yangi bosqichga ko‘tarilayotganini ko‘rsatadi. Bu kabi strategik maqsadlarni amalga oshirishda ham parlament va deputatlik korpusining qonunchilik asoslarini mustahkamlash borasidagi roli beqiyosdir.
Shuningdek, kelgusi yilga mo‘ljallangan Davlat dasturining 6 bosqichda izchil va batafsil tushuntirib berilgani islohotlarning aniq maqsad va vazifalar asosida amalga oshirilishini ko‘rsatadi. Bu jarayonda deputatlar ijro intizomini ta’minlash, qabul qilinayotgan qarorlar ustidan parlament va jamoatchilik nazoratini kuchaytirishda faol ishtirok etishi lozim.
Umuman olganda, Prezident Murojaatnomasi Yangi O‘zbekistonni barpo etish yo‘lida muhim dasturilamal bo‘lib, u davlat organlari, deputatlar va fuqarolik jamiyati institutlari oldiga aniq vazifalar qo‘yadi. Mazkur vazifalarning samarali ijrosi esa xalq va deputat o‘rtasidagi ishonchni mustahkamlab, mamlakatimiz taraqqiyotiga xizmat qiladi.
Ilhom Botirov,
O‘zLiDeP Samarqand viloyati Kengashi raisi, xalq deputatlari viloyat Kengashi deputati.
