«Qizil yelkanlar» bosh qahramoni Vasiliy Lanovoy vafot etdi
Moskvada 88 yoshida koronavirus bilan kasallangan sovet va Rossiya aktyori Vasiliy Lanovoy vafot etdi. Bu haqda TASSga uning rafiqasi, aktrisa Irina Kupchenko xabar berdi.
28 yanvar kuni Lanovoyning ahvoli keskin yomonlashdi, bir kun oldin shifokorlar uning ahvoli barqarorligini aytishdi. Aktyor sun’iy havo apparatiga ulangan va intensiv terapiyaga o‘tkazilgan, keyinchalik ahvoli og‘irlashib, klinik o‘lim ro‘y bergan.
Vasiliy Lanovoy Sovet va Rossiya teatr va kinosining iste’dodli aktyori edi. Faoliyati davomida u "Qizil yelkan", “Pavel Karchagin”, "Urush va tinchlik", "Ofitserlar", "Bahorning o‘n yetti lahzasi", "Anna va qo‘mondon", "Turbinlar kunlari" kabi 70 dan ortiq filmlar va teatrda yuzlab rol ijro etgan. Takrorlanmas ovozi bilan hujjatli film va dublyajda faoliyat yuritgan.
SSSR xalq artisti, Kerch va Moskvaning faxriy fuqarosi Vasiliy Lanovoy betakror rollari bilan insonlar qalbida qoladi.
