Turkiya parlamenti Shvetsiyaning NATOga a’zo bo‘lish tashabbusini ma’qulladi
Shvetsiyaning qo‘shilishi uchun 287 deputat ovoz bergan, 55 nafari qarshi chiqib, 4 nafari betaraf qolgan.
Turkiya parlamenti a’zolari Shvetsiyaning NATOga a’zo bo‘lish arizasini ma’qullash to‘g‘risidagi uzoq vaqtdan beri kechiktirilgan qonun loyihasini tezda qo‘llab-quvvatlashdi.
NATO bosh kotibi Yens Stoltenberg bu xabarga izoh berdi:
"Turkiya Buyuk Millat Majlisining Shvetsiyaning NATOga a’zoligini ratifikatsiya qilish bo‘yicha ovoz berishini mamnuniyat bilan qabul qilaman. Shuningdek, Vengriya milliy darajada ratifikatsiyani imkon qadar tezroq yakunlashini intiqlik bilan kutaman. NATO bo‘yicha barcha ittifoqchilar Vilnyusda Shvetsiyani bizning ittifoqimizga qo‘shilishga taklif qilishga kelishib oldi va Shvetsiya "Bizning majburiyatlarimizni bajardi. Shvetsiyaning a’zoligi NATOni kuchliroq va barchamizni xavfsizroq qiladi".
Alyans a’zosi bo‘lgan Turkiya Shvetsiyani Anqara o‘z xavfsizligiga tahdid deb hisoblagan guruhlarga nisbatan yumshoq munosabatda bo‘lganlikda ayblab, bir yildan ortiq vaqt davomida Shvetsiya taklifini ratifikatsiya qilishda to‘xtab qolgan. Gap birinchi navbatda Turkiya terrorchi deb hisoblagan Kurdiston ishchilar partiyasi haqida ketmoqda.
O‘tgan oy Turkiya parlamentining Tashqi ishlar komissiyasi Shvetsiyaning NATOga qabul qilinishi haqidagi ratifikatsiya protokolini tasdiqlab, u majlisga topshirilgan edi.
Shvetsiya arizasi butun parlament tomonidan ma’qullangach, hujjat imzolash uchun Turkiya prezidenti Rajab Toyyib Erdo‘g‘onga yuboriladi. Ittifoq mamlakatlari orasida Shvetsiyaning arizasini Vengriya ratifikatsiya qilmagan.
