Koronavirus: Xitoyda yana karantin

Millionlab xitoyliklar pandemiyaga qarshi kurashish uchun yana uzoq muddatli jamoaviy karantinni boshdan kechirmoqda. Pekinda himoya kostyumli ishchilar COVID-19 infeksiyasi qayd etilgan ba’zi hududlarda metall to‘siqlar o‘rnatishdi.

Odamlar tibbiy yordam olish uchungina tashqariga chiqishi mumkin. Ammo bunda ham ular sog‘lig‘i holati aks etgan skanerlangan QR-kodlarini ko‘rsatishlari shart.

Kecha sanoat shahri - Chjenchjouning 6,6 million aholisiga COVID-19 to‘lqini pasayguncha 5 kun uyda qolish buyurildi. Odamlar asabi tarang: yopilgan iPhone zavodida ishchilar to‘lanmagan maosh va mukofot pullarini talab qilmoqda. Noroziliklar kuchayib, huquq-tartibot idoralari vakillari bilan to‘qnashuvga aylangan.

Xitoy hukumatining koronavirusga nisbatan «nol-bardoshlik» siyosati kasallik ko‘payishi oldini olmadi. Kecha pandemiya boshlangandan beri rekord ko‘rsatkich - 31,444 ta yangi holat qayd etildi.