Xotin-qizlarga 14 foizlik ta’lim krediti ajratiladi

Shu va boshqa imtiyozlar Prezidentning “Oliy, o‘rta maxsus va professional ta’lim tashkilotlarida xotin-qizlarning ta’lim olishlarini qo‘llab-quvvatlashga doir chora-tadbirlar to‘g‘risida”gi qarorida belgilangan.

Qonunchilikka ko‘ra, 2022/2023 o‘quv yilidan respublikadagi barcha xususiy, xorijiy va davlat oliy, o‘rta maxsus va professional ta’lim tashkilotlarida kunduzgi, sirtqi va kechki ta’lim shaklida xotin-qizlarning to‘lov-kontrakt asosida tahsil olishi uchun imtiyozli shartlarda ta’lim kreditlarini moliyalashtirish maqsadida banklarga Davlat byudjetidan mablag‘ ajratishning yangi tizimi joriy etilgan.

Qarorga ko‘ra:

- ta’lim kreditlari 14 foiz stavkada ajratiladi;

- ta’lim kreditining asosiy qismi talabaning rasmiy o‘qish muddati tugagandan so‘ng yettinchi oydan boshlab 7 yil davomida qaytariladi;

- ta’lim kreditini rasmiylashtirishda va uning qaytarilishida talabaning doimiy daromad manbaiga ega bo‘lgan oila a’zolari va boshqa uchinchi shaxs birgalikda qarz oluvchi sifatida qatnashishiga ruxsat etiladi;

- “Ijtimoiy himoya yagona reyestri”ga kirgan oilalarning xotin-qizlariga ajratiladigan ta’lim kreditlari uchun garov va kafilliklar talab etilmaydi.

Ta’lim krediti bo‘yicha foiz stavkalari Ta’lim kreditini moliyalashtirish jamg‘armasi tomonidan so‘ndiriladi.