Андроид қурилмалар учун Zarnews.uz мобил иловаси. Юклаб олиш x

Мактабни очиш ёки ёпиш тўғрисидаги қарор ўқитувчи ва ўқувчиларнинг хавфсизлигини кўзлаб қабул қилинади

Хабарингиз бор, бугунги кунда барча ҳудудларда мактаб ўқитувчиларининг COVID-19 инфекциясига тест топшириш жараёни амалга оширилмоқда.

Тест топшириш жараёнида афсуски натижалар мусбат чиқаётган ҳолатлар ҳам бор. Қувонарли томони, аксарият ўқитувчиларда касаллик аломатларсиз енгил ҳолда кечаётгани сабабли, уларнинг айримлари ўзлари ҳам вирусни бошидан кечираётганидан бехабар бўлган.

Куни кеча Шайхонтоҳур тумани санитария-эпидемиологик осойишталик маркази маълумотига асосан COVID-19 инфекцияси аниқланган ўқитувчилар фаолият юритаётган тумандаги 40- ва 262-сонли мактаблар фаолияти эҳтиёткорлик ҳамда хавфсизлик мақсадида маҳаллий Кенгаш қарори билан вақтинча тўхтатилди.

Жаҳон соғлиқни сақлаш ташкилоти мазкур вирус 2 йилгача чекинмаслигини прогноз қилган. Бугун ҳар биримиз ушбу вирус билан яшашга, ҳеч қандай хавотирга тушмасдан, ҳаёт тарзимизни давом эттиришга ўрганишимиз лозим.

Маҳаллий кенгаш депутатлари томонидан қабул қилинган мактабларни ёпиш ёхуд очиш тўғрисидаги қарорлар у ёки бу мактаб жамоаси ва ўқувчилар саломатлигини ўйлаб амалга оширилади. Шу боис ўқитувчиларимиздан ҳам, ота-оналардан ҳам бундай ҳолатларда ортиқча хавотирга тушмаслик санитария-гигиена қоидаларига риоя қилган ҳолда одатий ҳаёт тарзини давом эттиришларини сўраймиз.

Бундай ҳолатларда ота-оналардан талаб қилинадиган асосий нарса масофадан яратиб берилаётган таълим имкониятларидан фойдаланиб, фарзандлари билим олишини назорат қилишдан иборат. Бу масалага жиддий ёндашишингизни илтимос қиламиз.

Карантинга олинган мактаблар дезинфекция ишлари амалга оширилганидан сўнг, маҳаллий Кенгаш депутатлари қарори билан яна ўз фаолиятини тиклайди.

Шу билан бирга, бугунги кунда барча ҳудудларда очилмаган мактаблар фаолиятини тиклаш бўйича ҳам ишлар кетмоқда.

Эслатиб ўтамиз, Ўзбекистон Республикаси Президенти топшириғи билан мактабларнинг очилиши ҳамда ёпилиши тўғрисидаги қарорни қабул қилиш ваколати фақатгина маҳаллий Кенгаш депутатларига топширилган.

Халқ таълими вазирлиги матбуот хизматининг хабарига кўра, 16 сентябрь ҳолатига республикада 2 550 та (25 %) мактаб ўз фаолиятини анъанавий шаклда амалга оширмоқда.