АҚШ президенти Путин ва Зеленскийга вакиллар юборди
Дональд Трамп 25 ноябрь куни Truth Social ижтимоий тармоғида Украина–Россия урушини тугатиш бўйича якунловчи тинчлик келишуви бўйича ўз вакилларига Москва ва Киевда учрашувлар ўтказишни топширганини маълум қилди.
Трампнинг айтишича, президентнинг махсус элчиси Стив Уиткофф Москвага бориб Владимир Путин билан мулоқот қилади. Шу пайтда АҚШ армияси вазири Дэн Дрисколл украиналик расмийлар билан учрашади.
Трамп сўнгги ҳафтада унинг жамоаси «урушни тўхтатиш борасида сезиларли силжишга эришгани»ни таъкидлади. АҚШ томони ишлаб чиққан дастлабки 28 банддан иборат тинчлик режаси икки томоннинг қўшимча таклифлари асосида қайта кўриб чиқилган ва унда фақат бир нечта баҳсли масала қолгани айтилади.
Президент Трамп Зеленский ва Путин билан яқин вақт ичида учрашишдан умидвор эканини билдириб, бундай учрашув фақат «келишув тўлиқ тайёр бўлганда ёки якунлаш босқичига кирганда» амалга ошиши мумкинлигини қайд этди.
Ўз навбатида Украина президенти Владимир Зеленский ҳам АҚШнинг тинчлик режасига қўшилиш ва Дональд Трамп билан иложи борича тез учрашишга тайёр. Бу ҳақда Украина президенти офиси раҳбари Андрей Ермак Axios нашрига берган интервьюсида маълум қилди.
