АҚШ президентига ҳужум саҳналаштирилганми ёки ҳақиқат?
АҚШда президент Дональд Трампга қилинган суиқасд ортидан турли тахминлар ва эҳтимол фитна назариялари авж олди. Айрим блогерлар ва таҳлилчилар бу воқеа сиёсатчининг рейтингини ошириш ёки жамоатчилик эътиборини бошқа масалалардан чалғитиш учун саҳналаштирилган бўлиши мумкинлигини айтмоқда. Америкалик журналист Жон Вароли ҳам суиқасдга уриниш режалаштирилган спектакль бўлиши мумкин, деган фикрни билдирди.
Ҳодиса 25 апрель куни Вашингтондаги Washington Hilton меҳмонхонасида, Оқ уй мухбирлари ассоциациясининг кечки тадбирида юз берган. Қуролланган шахс залга киришга уриниб, ўқ узган. Полиция маълумотига кўра, гумонланувчи 31 ёшли калифорниялик ўқитувчи Коул Томас Аллен бўлиб, унга АҚШ президентига суиқасд қилиш айби қўйилган. У ҳибсга олинган ва умрбод қамоқ жазоси билан юзма-юз келиши мумкин.
Фитна назарияларига сабаб бўлган “тасодифлар” ҳам муҳокама қилинмоқда. Яъни, ҳодисадан олдин Оқ уй матбуот котиби Каролайн Левиттнинг “Трамп нутқида “ўқ овозлари” бўлишини ҳазиломуз тарзда тилга олгани, телебошловчи Жимми Киммелнинг эса биринчи хоним Мелания Трамп ҳақида кескин ҳазил қилгани эслатилмоқда. Шу боис айримлар воқеа олдиндан режалаштирилган бўлиши мумкин, деб ҳисобламоқда.
Дональд Трамп эса бу даъволарни рад этиб, суиқасдни саҳналаштириш деб ишонаётганларни “носоғлом фикрлилар” деб атади. У воқеа пайтида хавотирга тушмаганини ва бундай фитна назариялари одатда ҳар қандай йирик ҳодисадан кейин пайдо бўлишини айтди. Шу билан бирга, MAGA ҳаракати ичида ҳам шубҳалар кучаймоқда — айрим собиқ тарафдорлар ҳатто 2024 йилдаги суиқасд уриниши ҳам саҳналаштирилган бўлиши мумкинлигини даъво қилмоқда.
