Блок-постдан гиёҳвандлик воситасини олиб ўтмоқчи бўлган шахс ушланди
2020 йилнинг 11 апрель куни соат тахминан 18:45 ларда Жиззах вилояти ИИБ ва туман ИИБ ходимлари томонидан ўтказилган тезкор тадбир давомида М-39 автомобиль йўлининг “Самарқанд-Жиззах” йўналиши бўйлаб ҳаракатланиб келаётган, “GENTRA” русумли транспорт воситаси Ғаллаорол тумани ҳудудида ташкил этилган блок постда тўхтатиб ҳужжатлари текширилди.
Текшириш давомида автомашина салонида бўлган йўловчи, 51 ёшли Ш.Р. ўзини шубҳали тутганлиги сабабли холислар иштирокида шахсий тинтув қилинганида, Ш.Р.нинг эгнидаги шимининг бел қисмида 4 дона оқ рангли полиэтилен пакетларга ўралган ҳолда оғирлиги 37,08 грамм бўлган “опий” гиёҳвандлик воситаси борлиги аниқланди ва тегишли тартибда расмийлаштириб олинди.
Мазкур ҳолат юзасидан Ғаллаорол тумани ИИБ ҳузуридаги тергов бўлими томонидан Ш.Р.га нисбатан Ўзбекистон Республикаси Жиноят кодексининг 276-моддаси 2-қисми “а” банди (гиёҳвандлик воситаларини ўтказиш мақсадини кўзламай, қонунга хилоф равишда кўп миқдорда сақлаш) билан жиноят иши қўзғатилган.
Ўзбекистон Республикаси ИИВ ҳузуридаги Тергов департаменти хабарига кўра, ҳозирда дастлабки тергов ҳаракатлари олиб борилмоқда.
