Давлат тилига эътиборни вазирликларимиздан бошлаш зарур

Ҳозиргина қўлимизга келиб тушган ушбу ҳужжат ўзбек тилига Давлат тили мақоми берилганининг 30 йиллиги арафасида мамлакатимиздаги йирик вазирликлардан бири - Ўзбекистон Республикаси Иқтисодиёт ва саноат вазирлиги томонидан юртимиздаги тегишли вазирлик ва хўжалик бирлашмалари, банклар, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликларига юборилган.

Шу ўринда эслатиб ўтамиз, “Давлат тили ҳақида”ги қонуннинг 8-моддасида “Ўзбекистон Республикасининг қонунлари, давлат ҳокимияти ва бошқарув органларининг бошқа ҳужжатлари давлат тилида қабул қилинади ва эълон этилади. Бу ҳужжатларнинг таржималари бошқа тилларда ҳам эълон қилинади” деб белгилаб қўйилган. Шунингдек, қонуннинг 9-моддасида давлат ҳокимияти ва бошқарув органларида иш давлат тилида юритилиши белгилаб қўйилган. Фақатгина заруриятга қараб бошқа тилларга таржима қилиниши таъминланиши белгиланган. Тўлиқ бошқа тилда ёзилади, дейилмаган.