Ҳайдовчилик гувоҳномасига эга бўлмаган 17 ёшли йигитнинг автомашина бошқариши кўнгилсиз воқеа билан якун топди

Самарқанд туманида яшовчи ҳайдовчилик гувоҳномасиз 17 ёшли йигит синглисининг дугоналарини манзилига элтиб қўйиш мақсадида уйидан "Cobalt" автомашинасини олиб чиқади. У «Чақа» маҳалла фуқаролар йиғини ҳудудида автомашинани катта тезликда бошқараётган вақтда рул бошқарувини йўқотиб, йўлнинг чап томонига ўтиб, ағдарилиб кетган ва оқибатда йўл-транспорт ҳодисасини содир этган.

Ушбу ЙТҲ натижасида автомашина салонида бўлган 3 нафар йўловчидан бири воқеа жойида, яна бири шифохонада вафот этган. Учинчи йўловчи эса турли тан жароҳатлари билан шифохонага ётқизилган.

Мазкур ҳолат юзасидан Жиноят кодексининг 266-моддаси 3-қисми билан жиноят иши қўзғатилиб, дастлабки тергов ҳаракатлари олиб борилмоқда.