Нуробод туманида поезд йўлига тош қўйган мактаб ўқувчиси аниқланди
Жорий йилнинг 29 октябрь куни Самарқанд вилояти ИИБ транспортда хавфсизликни таъминлаш бошқармасига “Қарши-Самарқанд-Тошкент” йўналишидаги “Афросиёб” тезюрар йўловчи поезди “Улус-Гумбаз” темир йўл бекатлари оралиғида ҳаракатланаётган вақтида темир йўл изига тош қўйилганлиги аниқланган.
Суриштирув ишлари натижасида темир йўл изига тош бўлакларини қўйган фуқаро 6-синф ўқувчиси, Нуробод тумани Олтинсой маҳалласида яшовчи вояга етмаган С.Ж. эканлиги аниқланди.
ИИВ транспортда хавфсизликни таъминлаш бош бошқармаси хабарига кўра, ҳолат юзасидан суриштирув ишлари давом этмоқда.
Шу ўринда эслатиб ўтиш жоизки, бундай қизиқишнинг оқибати аянчли якун топиши мумкин. Масалан, поезд рельсдан чиқиб кетиши, инсонларнинг ҳаёти хавф остида қолиши, шунингдек, техноген ёки экологик фалокат юз бериши мумкин. Бу каби ҳаракатлар йўловчилар ва юкларни ташишда поездлар ҳаракати хавфсизлигига бевосита таҳдид солади ва ҳаракат жадвалининг бузилишига олиб келади. Ўзингиз ва ўзгаларнинг ҳаётига бефарқ бўлманг.
