ОТМларда ҳар ойда коррупцияга қарши курашиш кунини белгилаш таклиф этилди

Самарқанд давлат университетида Олий Мажлис Сенати Қонунчилик ва суд-ҳуқуқ масалалари ва коррупцияга қарши курашиш қўмитаси раиси Ботир Матмуратов вилоятдаги олий ўқув юртлари ректорлари, проректорлар, ўқитувчи ва талабалар билан коррупцияга қарши курашишга бағишланган учрашув ўтказди.

Энг йирик коррупция ҳолатлари қурилиш ва таълим соҳаларида учраётгани, унга қарши курашда аввало, олий таълим даргоҳи ректорлари, ўқитувчиларининг ўрни катта эканлиги, талабалр ўртасида ижтимоий сўровлар ўтказиш лозимлиги айтилди.

- Коррупцияга қарши курашишдан асосий мақсадимиз билимли, салоҳиятли ёшларни тарбиялаш, - деди Б.Матмуродов. – Коррупция қачон пайдо бўлади? Қачонки, домлаларнинг пулга эҳтиёжи пайдо бўлса. Келинг, улар учун бир кунни мактабларда дарс бериш учун ажратиб берайлик. Мактабда берган дарс соатлари учун ҳам олинган ойлик уларнинг сессияда пул олмаслигига замин яратиши мумкин. Шунингдек, талабалар ўртасида сўровлар олиб бориш лозим.

Талабалар билан суҳбатлардан аён бўлишича, биринчи босқич таҳсили давомида улар дарсларга масъулият билан ёндашади, семестр якунида эса домлаларнинг арзимаган пул эвазига баҳоларни қўйиб бермаётганини кўриб, ўқишга бўлган қизиқиши йўқолади. Аслида, домлалар бу пул билан бойиб қолмайди. Аммо бу ҳолат талабаларнинг билим олишга бўлган иштиёқини сўндиради.

Учрашувда ректорларга ҳар ойнинг бир кунини коррупцияга қарши курашиш куни этиб белгилаш таклифи билдирилди.

Шунингдек, Сенат қўмитаси раиси ва қўмита аъзоси Ф.Тошев вилоят Халқ қабулхонасида ҳам бўлиб, фуқароларнинг коррупция билан боғлиқ мурожаатларини тинглади.