Коррупцияга қарши курашиш давлат сиёсатининг устувор йўналиши
Жамиятда коррупция оддий халқ вакилларининг юқори амалдорларга ёки давлат амалдорларининг ўзаро бир-бирларига бўлган муносабатидан келиб чиқади. Ушбу салбий ҳолатларнинг ҳар қандай кўриниши жамиятни ҳалокат ёқасига олиб бориши муқаррар.
Шундай экан, ушбу иллатга қарши курашиш мақсадида мамлакатимизда коррупцияга барҳам бериш, ҳокимият амалдорларининг ҳалол ишлашини таъминлаш, тадбиркорлар олдида турган бюрократик тўсиқларни олиб ташлаш, давлат органлари фаолиятининг очиқлиги ва шаффофлигини таъминлаш, давлат ва халқ ўртасидаги жараёнларда инсон омилини камайтиришга қаратилган бир қатор қонун ва қонуности ҳужжатлари қабул қилинган ва бу бежиз эмас.
Жумладан, Ўзбекистон Республикасининг “Коррупцияга қарши курашиш тўғрисида”ги, “Жамоатчилик назорати тўғрисида”ги, “Давлат харидлари тўғрисида”ги Қонунлари, Ўзбекистон Республикаси Президентининг “Ўзбекистон Республикасида коррупцияга қарши курашиш тизимини янада такомиллаштириш чора-тадбирлари тўғрисида”ги Фармони ва “Ўзбекистон Республикаси Коррупцияга қарши курашиш агентлиги фаолиятини ташкил этиш тўғрисида”ги қарори муҳим аҳамият касб этиб, ўз натижаси ва самарасини бериб келмоқда. Ушбу ҳужжатларда коррупцияга қарши курашиш соҳасида ҳуқуқий маданиятни юксалтириш, коррупциянинг олдини олишга доир чора-тадбирлар, коррупцияга оид ҳуқуқбузарликларни аниқлаш, уларга чек қўйиш, жавобгарликнинг муқаррарлиги каби масалалар аниқ белгилаб қўйилган.
Бугунги кунда мамлакатимизда коррупцияга қарши курашиш давлат сиёсатининг энг устувор йўналишларидан бири сифатида белгиланган.
Жорий йил 5 март куни Президент Шавкат Мирзиёев Коррупцияга қарши курашиш миллий кенгашининг йиғилишида фуқаролик жамияти институтларининг коррупциянинг олдини олишдаги ролига алоҳида эътибор қаратди.
Давлатимиз раҳбари коррупцияга қарши кураш умуммиллий вазифа, ҳар бир ватанпарвар юртдошимизнинг виждон иши, бу жараёндан ҳеч ким четда турмаслиги кераклигини қайд этди. Шу боис, коррупцияга нисбатан муросасиз бўлиш учун янада кўпроқ шароит яратиб, бунга кенг жамоатчилик ва депутатлар жалб қилиниши зарурлиги қайд этилди.
Шунингдек, йиғилишда парламент кенг жамоатчилик билан яқин ҳамкорликни йўлга қўйиб, уларнинг имкониятларидан кенг фойдаланиши мақсадга мувофиқ экани таъкидланди. Масалан, Коррупцияга қарши курашиш бўйича конвенция талабларини мониторинг қилишга нодавлат ташкилотлар жалб қилинса, катта самара беришига ишонч билдирилди. Ушбу мақсадлар учун янги лойиҳаларни қўллаб-қувватлашга ҳар йили 10 миллиард сўмдан ажратиб борилиши айтилди.
Шу ўринда эътироф этиш керакки, коррупциянинг ҳар қандай турига қарши курашишда давлат фуқаролик жамияти институтлари билан ҳамкорликда иш юритиши мақсадга мувофиқ.
Айтиш мумкинки, коррупцияга қарши курашишда сиёсий партиялар, депутатлар, нодавлат нотижорат ташкилотлари ва фуқаролик жамиятининг бошқа институтлари томонидан олиб борилаётган ишлар бугун ўз самарасини бермоқда. Хусусан, тадбиркорлик, соғлиқни сақлаш, инсон ҳуқуқларини ҳимоя қилиш каби соҳаларни тартибга солиш борасида кўрсатилаётган ташаббуслар шулар жумласидандир.
Хулоса ўрнида таъкидлаш жоизки, коррупцияга барҳам беришга фақат давлат ва ҳукуматнинг кучи билангина эришиб бўлмайди. Шунинг учун мазкур ижтимоий иллатга қарши бутун жамият, барча фуқаролар фаол курашмоғи зарур.
Илҳом Ботиров,
ЎзЛиДеП вилоят Кенгаши раиси, халқ депутатлари вилоят Кенгаши депутати
