Википедиянинг хатоси ёхуд ҳар доим ҳам ВИКИга ишонаверманг
Бу гапни бежиз айтмаяпман. Иккинчи жаҳон уруши қатнашчиси, машҳур мерган ва санъаткор Зебо Ғаниевани википедияда озарбайжонлик, деб маълумот беришибди.
Эсимда.1995 йилда Алишер Навоий номидаги нафис санъат лицейида ўқиб юрганимизда у бир гуруҳ сафдошлари - халқ артистлари Гавҳар Раҳимова, Коммуна Исмоилова, Яйра Абдуллаевалар билан биргаликда лицейимизга меҳмон бўлиб келишганди. У озгина оқсоқланиб, ҳассага таяниб юраркан. Кимдир ўшанда унинг бир оёғи протез эканлигини айтганди.
Учрашувда у киши сўзини ўзбекча бошлаб, мулойимлик билан «Русча гапирсам майлими?», деганди. Чунки у уруш тугаганидан буён Москвада яшарди. Кейинчалик лицейимизда Гавҳар Раҳимова раҳбарлигида Зебо Ғаниева номидаги қўшиқчи қизлар ансамбли тузилиб, анча вақт фаолият юритди. Минг афсуски, ҳозирги ёшларнинг кўпчилиги Зебо Ғаниева, Гавҳар Раҳимовалар ҳақида билишмаса ҳам керак. Тағин билмадим.
Википедиядаги нотўғри маълумотни ўқиб эса, очиғи, ҳайрон бўлдим. Зебо Ғаниева қайси вилоятимиздан эканлигини билмайман-у, аммо ўзимизнинг юртимиздан эканлигини, ўзбек қизи эканини аниқ биламан. Чунки у лицейимиздаги ўша суҳбатда ўзбекистонлик эканини, ўзбеклигини айтганди. Балки озарбайжон миллатига мансуб инсонга турмушга чиққани учун ҳам шундай хатолик рўй бергандир.
Хуллас, википедиядаги маълумотларга ҳар доим ҳам ишониб бўлмас экан.
***
Қуйидаги суратда Зебо Ғаниева "Тоҳир ва Зуҳра" фильмидаги Хоразм маликаси образида.
Лазизжон Баҳранов.
Манба: @gulqaychi
