2023 йил ҳолатига кўра дунёдаги энг йирик армиялар

30.10.2023 22:34
255
Ўқинг, қизиқ!

Армиялардаги аскарлар сони чегарадош давлатлар ўртасидаги тўқнашувларда асосий тўхтатувчи куч ҳисобланади. Бугунги кунда, дунёда қуролли можаролар сони ортиб бораётган бир пайтда, маълум бир давлат миллий армиясининг сони ва унинг қуролланиш даражаси каби жиҳатлар томонлар ўртасидаги қарама-қаршиликларнинг олдини олиш ҳамда вазиятни барқарорлаштириш борасида муҳим омил бўлиб қолмоқда.

Германиянинг турли йўналишдаги истеъмолчилар маълумотларини тўплаш ва таҳлил қилишга ихтисослашган “Statista” портали тадқиқот ўтказди ва 2023 йил ҳолатига кўра дунёдаги энг катта 10 та армияни аниқлади.

Хитой

2 миллион аскардан иборат миллий армияга эга Хитой дунёда биринчи ўринда туради. Хитой-Япония уруши тугаганидан сўнг Халқ озодлик армияси (ХХОА) сифатида ҳам танилган Хитой армияси ўзининг ракета қўшинлари ва бирлашган стратегик ва моддий-техник қўллаб-қувватлаш кучларини ўз ичига олган бир неча бўлинмалардан иборат.

Ҳиндистон

Маълумотларга кўра, Ҳиндистон армиясининг сафларида 1,45 миллионга яқин фаол ҳарбий хизматчи бор. Захирадаги 1,15 миллион аскардан иборат қўшимча қувватга эга ушбу муҳим ҳарбий контингент дунёдаги энг йирик армиялардан бири ҳисобланади. БМТнинг тинчликпарварлик операцияларида бу армиядан фаол фойдаланилади.

АҚШ

Қўшма Штатлар Қуролли Кучлари АҚШ армияси, денгиз флоти, ҳаво кучлари, денгиз пиёда аскарлари корпуси ва космик кучлардан иборат 1,39 миллион фаол аъзога эга.

Шимолий Корея

Корея халқ армияси расмий равишда дунёдаги тўртинчи йирик армия сифатида танилган. Олий Бош қўмондон, фельдмаршал унвонига эга давлат раҳбари Ким Чен Ин қўмондонлиги остидаги Шимолий Корея миллий армияси 1,2 миллионга яқин аскардан иборат. Шимолий Кореядаги ҳарбий хизмат дунёдаги энг узоқ муддатли бўлиб, ватан олдидаги бурчни эркаклар 10 йил, аёллар эса 8 йил давомида ўтайди.

Россия

Охирги бир ярим йил давомида Россия армияси, биринчи навбатда, Россиянинг Украинада давом этаётган махсус ҳарбий операцияси туфайли хорижий ОАВ янгиликларининг диққат марказида бўлиб келмоқда ва унинг 831 минг ҳарбий хизматчиси бор.

Покистон

654 минг ҳарбий аскар билан қуролли тўқнашувларга тайёр турганлиги сабабли Покистон армияси ҳам сўнгги пайтда хорижий оммавий ахборот воситалари эътиборини кучайтирмоқда.

Эрон

Эрон Ислом Республикаси қуролли кучлари “Артеш” армияси, “Сепаҳ” Ислом инқилоб гвардияси корпуси ва ҳуқуқни муҳофаза қилувчи органлардан иборат. Бу армия асосан мамлакат ичкарисида ва Форс кўрфазида жойлаштирилган 575 минг нафар фаол ҳарбий хизматчига эга.

Жанубий Корея

Жанубий Корея БМТ миссияларида фаол иштирок этадиган ва америкалик ҳарбийлар билан бирга кўплаб машғулотларда қатнашадиган 555 мингга яқин фаол аскарларга эга.

Вьетнам

1948 йил 22 декабрда Вьетнам мустақиллиги муносабати билан ташкил этилган, 1970 ва 1980 йилларда Жануби-Шарқий Осиёдаги йирик можароларда муваффақиятли иштирок этгани билан машҳур Вьетнам халқ армияси сафларида 470 мингга яқин аскар хизмат қилади.