АҚШ Вакиллар палатаси полицияда реформа ўтказиш тўғрисидаги қонун лойиҳасини қабул қилди
АҚШ Конгрессининг вакиллар палатаси полиция реформаси ўтказилиши тўғрисидаги қонун лойиҳасини қабул қилди. Бу ҳақда The Hill нашри хабар берди.
“Жорж Флойд. Адолатли полиция ҳақидаги қонун” номини олган қонун лойиҳаси учун 236 нафар палата аъзоси овоз берган бўлса, 181 нафар конгрессмен қарши овоз берди.
Қонун лойиҳаси полициячиларга ҳибсга олиш чоғида буғиш усулини қўллашни тақиқлайди. Шу билан бирга, хизмат фаолияти вақтида қоидабузарликларга йўл қўйган полициячилар маълумотлар базасини ташкил этишни ва бундай полиция ходимларини кузатувга олишни назарда тутади. Шунингдек, янги қонун полиция томонидан тинтув ўтказилиши, гумондорнинг уйига киришини ва асоссиз куч ишлатилишини чеклайди.
Қонун лойиҳаси қонуний кучга кириши учун сенат тасдиғидан ўтиши лозим. Ундан кейин у Президент Доналд Трампга имзолашга юборилади.
Эслатиб ўтамиз, 25 май куни АҚШнинг Миннеаполис штатида афроамерикалик Жорж Флойд ҳибсга олинаётган вақтда полиция томонидан қўлланилган зўравонлик оқибатида вафот этди. Шундан сўнг АҚШнинг барча йирик шаҳарлари ва бир қатор бошқа давлатларда ирқчилик ва миллатчиликка қарши намойиш ва тартибсизликлар авжига чиқди ва бугунги кунга қадар давом этмоқда.
