Дунёдаги ҳарбий харажатлар «совуқ уруш» давридаги рекордни янгилади. Мадридда ёруғлик хурсандчилик билан кутиб олинди. Ғазога ҳужумлар яна 12 ой давом этади
🔹 Россия президенти Владимир Путин 28 апрель куни баёнот бериб, Иккинчи жаҳон урушида қозонилган Ғалабанинг 80 йиллиги муносабати билан Россия қўшинлари 8-11 май кунлари барча жанговар ҳаракатларни тўхтатишини эълон қилган эди. Бу ташаббусга жавобан Украина президенти Владимир Зеленский дарҳол, ҳеч бўлмаганда, 30 кунлик ўт очишни тўхтатишни таклиф қилди. Кремль матбуот котиби Дмитрий Песков бу таклифни изоҳлар экан, бундай узоқ муддатли сулҳ фақатгина Россия президенти томонидан илгари сурилган «нюанслар» инобатга олинса амалга ошиши мумкинлигини билдирди. Украина ҳозирча Путин эълон қилган вақтинча сулҳга расмий муносабат билдирмаган.
🔹 АҚШ Конгрессининг Мичиган штатидан сайланган вакили, демократик партия аъзоси Шри Танедар АҚШ президенти Дональд Трампга қарши импичмент жараёнини бошлади. Унинг айтишича, Трамп Конституцияни бузган ва ҳукуматни узурпация қилишга уринган.
🔹 Венгрия парламенти Халқаро жиноят судидан чиқиш ҳақида қарор қабул қилди. «Бу қарор орқали биз холислик ва обрўсини йўқотган, сиёсийлашган тузилманинг бир қисми бўлишдан бош тортамиз», деди мамлакат ташқи ишлар вазири.
🔹 АҚШ президенти Дональд Трамп ўз президентлик муддатининг илк 100 кунини якунламоқда. Сайловолди ваъдаларга қарамай, у ҳозиргача Украинадаги урушни ҳатто вақтинча тўхтатишга эриша олмади. Аммо маъмурияти шу ҳафта қандайдир дипломатик бурилишга умид қилмоқда. Шу билан бирга, ҳатто агар АҚШ тинчлик келишувини таъминлай олса, Владимир Путиннинг реванш режаларини тўхтатиши эҳтимоли кам.
🔹 Стокгольм тинчлик муаммоларини тадқиқ қилиш халқаро институти маълумотларига кўра, 2024 йилда глобал ҳарбий харажатлар 2,718 триллион долларга етди — бу 2023 йилга нисбатан 9,4 фоиз кўпдир. 100 дан ортиқ давлат мудофаа бюджетларини оширган.
🔹 Бир кун аввал Испания, Португалия ва Андоррада кенг кўламли электр таъминоти узилиши рўй берди. Бундан сўнг Мадрид аҳолиси электр таъминоти қайта тикланганини хурсандчилик билан қарши олди. Португалия расмийларига кўра, электр узилиши ҳаво ҳароратидаги кескин ўзгаришлар билан боғлиқ камёб атмосфера ҳодисаси натижасида юз берган бўлиши мумкин.
🔹 АҚШ президенти Дональд Трамп айрим автомобилсоз компанияларини божхона божларидан озод этишни режалаштирмоқда. Бошқа мамлакатлар каби Япония АҚШ божлари минтақавий хавфсизликка таҳдид солаётганини айтмоқда.
🔹 Исроилнинг стратегик масалалар бўйича вазири маълум қилишича, Ғазо секторига қилинган ҳарбий операциялар келаси 12 ой давом этади. 7 октябрда бошланган уруш «ғалаба» билан якунланиши керак, дейди вазир. У қандай ғалаба назарда тутилганини аниқлаштирмаган. Уруш давомида 52 мингдан зиёд фаластинлик ҳалок бўлгани айтилмоқда.
Г.Холдорова тайёрлади.
