Иброҳим Халил аз Завади: Аллоҳ Таъоло Шавкат Мирзиёевни яхшилик билан мукофотласин!
Шанхай ҳамкорлик ташкилотининг Самарқанда саммитида иштирок этиш учун Самарқандга ташриф буюрган Араб давлатлари уюшмаси бош котиби ўринбосари Иброҳим Халил аз Завади ва уюшма қошидаги Осиё давлатлари билан ҳамкорлик бўлими бошлиғи Муҳаммад бин Сиддиқ Ҳадис илми мактабида бўлди.
Меҳмонлар мазкур ўқув даргоҳи ва унинг фаолияти, бу ерда талабалар учун яратилган шарт-шароитлар билан яқиндан танишди.
Ҳадис илми мактаби ректори Олимхон Юсупов Президент Шавкат Мирзиёев ташаббуси билан юртимизда Имом Бухорий ва бошқа буюк муҳаддислар меросини ўрганиш ва тадқиқ этишга алоҳида эътибор қаратилаётгани, ушбу таълим даргоҳи ҳам ана шу эътибор туфайли ташкил этилгани ҳақида гапириб берди. Мактаб тинловчиларининг ўқув машғулотларида қатнашишлари, дарсдан бўш вақтларини мазмунли ўтказишлари, спорт билан шуғулланишлари учун яратилган шароитлар билан таништирди.
Юксак мартабали меҳмонлар мамлакатимизда ислом дини равнақи йўлида олиб борилаётган ишларга юқори баҳо бериб, бунинг натижаси диний таълим-тарбия ва бошқа соҳаларда ўз ифодасини топаётганини таъкидлади.
Ташриф якунида меҳмонлар Ҳадис илми мактаби фахрий меҳмонлар китобига ўзларининг самимий тилакларини ёзди.
“Мен бугунги муборак кунда Ҳадис илми мактабини зиёрат қилиб хурсанд бўлдим. Президент жаноби олийларининг муборак тавсиялари, Қуръон ва ҳадис илмларига бўлган эътиборларини ва талабалар учун илм олиш машаққатларини енгиллатиб, барча имкониятларини яратиб берганларини эшитдим. Аллоҳ Таъоло у зотни яхшилик билан мукофотласин ва жаноби олийларни қадрли куч ва саъй-ҳаракатларига барака берсин” деб ўз дил сўзларини ёзиб қолдирди Араб давлатлари уюшмаси бош котиби ўринбосари Иброҳим Халил аз Завади.
