Жавоҳир Синдоров - Titled Tuesday ғолиби!
Ҳафтанинг ҳар сешанба куни дунёнинг таниқли гроссмейстерлари иштирокида Titled Tuesday онлайн мусобақаси ўтказиб келинмоқда.
Ушбу мусобақада ўзбекистонлик шахматчилар ҳам мунтазам иштирок этиб, ижобий натижаларга эришяпти. Жумладан, кечаги турнирда Жавоҳир Синдоров чемпион бўлди. Ёш гроссмейстеримиз 11 имкониятдан 9,5 очко тўплаб, қўшимча кўрсаткичларга кўра биринчи ўринни эгаллади.
Синдоров сингари 9,5 очко жамғарган америкалик Ханс Ниеманн иккинчи ўринни банд этган бўлса, кучли учликка мексикалик Хосе Мартинес 9 очко билан якун ясади. Ўзаро учрашувда Жавоҳир Хансни мағлуб этгани эътиборга молик ҳолат. Тўққиз очкога эга эронлик Парҳам Мақсудлу ва америкалик Ҳикару Накамура кейинги поғоналардан жой олди.
Жавоҳир Синдоров Сэм Шанкланд, Ханс Ниеманн, Парҳам Мақсудлу, Олександр Бортник каби кучли шахматчилар устидан ғалаба қозонди. Ушбу чемпионлик унга 1000 АҚШ доллари миқдоридаги мукофот пулини келтирди. Магнус Карлсен кечаги турнирда 8,5 очко билан 7-ўрин билан чекланди.
