Келажак бунёдкори бўлиш – юксак бурчим
Бу мақсадимни Президент Шавкат Мирзиёевга баралла айтдим. Эндиги ҳаракатим - ваъдамнинг устидан чиқиш.
Тил ўрганиш ва таниқли бизнесмен бўлиш болаликдаги орзуим эди. Оилада ота-онам ҳамда мактаб дарслари ва қўшимча тўгаракларда устозларим томонидан берилган таълим-тарбия орзуларимни мақсадга айлантирди.
Айниқса, кейинги йилларда мамлакатимизда ёшларнинг тил ўрганиши, таълим олиши, турли халқаро университетларда ўқиши учун имкониятлар эшиги кенгроқ очилди. 2017 йилда Германия Федерациясининг DAAD стипендияси орқали шу давлатнинг “European University of Viadrina” университетига ўқишга қабул қилинганим мақсадимга эришишдаги илк қадам бўлди. Университетнинг 3 йиллик бакалавр ўқишини 2 йилда, яъни 2019 йилда имтиёзли тамомладим. Бундай ҳолат университетнинг яқин 50 йиллик тарихида илк марта содир бўлган экан.
2020 йилда QS рейтинги бўйича дунёда 16-ўринда турувчи Буюк Британиянинг Edinburg университетининг магистратура босқичини аъло баҳолар билан тамомладим. Талабалик давримда Oxford ва Cambridge каби университетларнинг конференцияларида мунтазам иштирок этдим.
2021 йилда “Polyglot school” хорижий тилларни ўргатиш марказини ташкил қилдим. Ушбу марказда 100 нафардан зиёд тажрибали ўқитувчи фаолият олиб боради. Жумладан, Германия, Франция ва АҚШдан таклиф қилинган мутахассислар ёшларга хорижий тилларни ўргатмоқда. Бу ерда таълим олган ёшларнинг 70 нафари дунёнинг топ 100 таликка кирган олий ўқув юртларига грант асосида ўқишга қабул қилинган.
Ўзим ҳам бир зум ўқиш, изланишдан тўхтаганим йўқ. Еттита тилда эркин сўзлаша оламан. Инглиз, немис, турк тилларини билиш даражаси бўйича халқаро сертификатларга эгаман.
Яқинда Ёшлар куни муносабати билан Президент фармонига асосан “Келажак бунёдкори” медали билан тақдирландим. Шу муносабат билан ўтказилган учрашувда мукофотни Президент ўз қўллари билан кўксимга тақиб қўйиши жуда қувончли ва ҳаяжонли бўлди. Мени тақдирлар экан, биз каби тадбиркор ёшлардан миннатдорлигини айтиб, келгусида ҳам хайрли ишларни амалга оширишим учун ишонч билдирди.
Учрашувида сўзга чиқиб, давлатимиз раҳбарига минбарда туриб миннатдорлик билдириш ҳам насиб этди. Учрашувда медалда ёзилганидек, келажак бунёдкори бўлишни зиммамга юклатилган масъулият, олдимга қўйган ҳаётий миссиям, юксак бурчим эканлигини айтдим.
Шоҳруҳ Қудратов.
