Кўчма савдо жойларидан қанча муддат фойдаланиш мумкин?

Вазирлар Маҳкамасининг 2021 йил 3 августдаги “Кўчма савдо фаолиятига замонавий ахборот технологияларини янада кенг жорий этиш ҳамда савдо автомати орқали чакана савдо фаолиятини тартибга солиш чора-тадбирлари тўғрисида”ги қарорига асосан, кўчма савдо жойлари “E-auksion” электрон савдо платформаси орқали чиқарилиши белгиланган.

Тадбиркорлик субъектига электрон онлайн-аукционда сотиб олинган кўчма савдо жойидан 36 ой муддатга фойдаланиш ҳуқуқи берилади.

Қарорга кўра, кўчма савдо объектини жойлаштириш муддати икки марта узайтирилиши мумкин. Бунда кўчма савдо субъекти кўчма савдо объектини жойлаштириш муддати тугагунга қадар “К-САВДО” ААТда кўчма савдо объектини жойлаштириш муддатини узайтириш тўғрисидаги электрон ариза жўнатиши белгиланган.

Электрон бланка тўлдирилгандан сўнг “К-САВДО” ААТ кўчма савдо субъектининг электрон почта манзилига кўчма савдо объектини жойлаштириш муддати узайтирилганлигини тасдиқловчи QR-код (матрисали-штрихли код) қўйилган электрон ҳужжат юборади.

Қаҳрамон ЭШОНҚУЛОВ,

“Электрон онлайн-аукционларни ташкил этиш” АЖ вилоят ҳудудий вакили.