Maktabgacha ta’lim tizimining dolzarb masalalari muhokama etildi
Samarqand davlat universitetida “Maktabgacha ta’lim tizimini rivojlantirishda ilmiy-amaliy innovatsiyalarning pedagogik ahamiyati” mavzusida xalqaro ilmiy-amaliy konferensiya o‘tkazildi.
Zoom orqali tashkil etilgan konferensiyada Xitoy, Rossiya, Koreya, Turkiya, Hindiston, Fransiya, Qozog‘iston, Qirg‘iziston, Ozarbayjon, Ukraina, Bolgariya, Portugaliya davlatlaridan soha mutaxassislari ishtirok etdi. Shuningdek, 300 ga yaqin mutaxassis va olimlar o‘zlarining maktabgacha ta’lim sohasidagi bugunning dolzarb masalalariga qaratilgan ma’ruzalari bilan qatnashdi.
Konferensiyada maktabgacha ta’lim tizimini rivojlantirishning nazariyasi va metodikasiga oid innovatsiyalar, oliy ta’lim va maktabgacha ta’lim tashkilotlari o‘rtasidagi hamkorlik aloqalarini kuchaytirish, maktabgacha ta’limni axborotlashtirish, innovatsiya, o‘rgatuvchi texnologiyalar, elektron resurslar, ilg‘or xorijiy tajribalar asosida davlat va nodavlat MTTlar faoliyatini takomillashtirish kabi maktabgacha ta’lim tizimining muhim masalalari muhokama qilindi.
- Maktabgacha ta’lim muassasalari tizimini rivojlantirish, bolalarni bog‘chalarga jalb etish, maktabga tayyorlash bugungi kunda muhim masalalardan biri sifatida qaralmoqda, - deydi pedagogika fanlari doktori Shoxida Taylanova. – Mazkur ilmiy-amaliy konferensiyamizdan ko‘zlangan maqsad ham sohadagi innovatsiyalarning ahamiyati, ko‘plab davlatlar bilan hamkorlik o‘rnatib, ular bilan har tomonlama tajriba almashish, davlat va nodavlat bog‘chalarda tabiiy va gumanitar fanlarni o‘rgatish bo‘yicha kreativ g‘oyalarni o‘rganishdan iborat. Har bir davlatning ilg‘or tajribasidan kelib chiqib, sohada amalga oshirishimiz lozim bo‘lgan ishlarni tizimli joriy etishimiz lozim. Misol uchun, Koreya davlatida davlat bog‘chalari nodavlat bog‘chalarga qaraganda ancha qimmat turadi. Koreyalik mutaxassislarning fikricha, buning sababi davlat bog‘chalarida olim va olimalarning jiddiy e’tibori, tizimda amalga oshirilayotgan yangiliklarni amaliyotda qo‘llab, kutilgan natijaga erisha olishida, deb hisoblashadi. Bizda aksincha. Sababi uzoq yillar e’tibordan chetga qolgan maktabgacha ta’lim tizimida kadrlar yetishmasligi muammosi o‘zining dolzarbligini yo‘qotmagan. Samarqand davlat universiteti tomonidan malakali kadrlar tayyorlashga alohida e’tibor qaratilib, bir qator imtiyozlar berildi. Xalqaro konferensiya ham maktabgacha ta’lim tizimini rivojlantirishning turli jabhalarini qamrab olgan.
Konferensiyada bolalar badiiy adabiyotining ular nutqini rivojlantirishdagi ahamiyati, maktabgacha ta’lim tizimiga zamonaviy yondashuv, bolalarning sog‘lom rivojlanishida maxsus jismoniy harakatlarning o‘rni, inklyuziv ta’lim bo‘yicha Fransiya tajribasini o‘rganish va amalga oshirish, Boshqirdiston Respublikasida maktabgacha ta’lim tashkilotlariga tarbiyachilarni tayyorlashda ularning kasbiy mahoratini rivojlantirish kabi mavzularda ma’ruzalar tinglandi. Shu bilan birga qator davlatlar bilan hamkorlik shartnomalari imzolandi.
Nasiba JONTO‘RAYeVA.
