Орлотлик аёлларга тикиш машинаси тарқатилди

11 ноябрь – Ўзбекистон касаба уюшмалари куни муносабати билан Иштихон туманининг Орлот маҳалласида учрашув бўлиб ўтди.

Ўзбекистон касаба уюшмалари Федерацияси вилоят кенгаши раиси Суҳроб Рафиқов ҳамда касаба уюшмалари ходимлари билан маҳалла аҳолиси ўртасидаги самимий мулоқотда бир қатор ижтимоий-иқтисодий муаммоларга ечим топилди.

Хусусан, Орлот маҳалласида яшовчи Умида Қувондиқова бичиш-тикишга бўлган қизиқиши борлиги ва агар тикув машинаси бўлса, оиласига қўшимча даромад келтириши мумкинлигини билдирди ва шу ернинг ўзида унга тикув машинаси совға қилинди.

Мулоқот давомида касаба уюшма ташкилоти ходимлари халқ орасига кириб бориши, уларнинг  ҳаётий ташвишларига шерик бўлиши ташкилотнинг кундалик вазифасига айланганини билдирди. Жойларда халқ билан юзма-юз мулоқотда бўлиш натижасида кўплаб муаммоларнинг ечимини излашга ва топишга имкон яратилаётгани таъкидланди.

Учрашув давомида Умида каби бир неча аёллар ҳам тикувчилик фаолиятини йўлга қўйишда қийналаётганликларини билдиришди. Касаба уюшмалари ва ҳокимлик бу муаммога шу ернинг ўзида ечим топди ва 5 нафар чевар хотин-қизга  замонавий тикув машинаси берилди.

Шунингдек, маҳалланинг ташвишлари, қишлоқдаги ташкилий жараёнларда фаоллик кўрсатиб келаётган фуқароларга совғалар топширилди.

Нурилла Шамсиев.