Орзуга ишончли ҳаракат билан эришилади
Сизга керак бўладиган нарса ҳаммага керакдек туюлади. Яъни, бойлик, ҳашаматли уй ҳаммага керак. Атрофингизга боқинг, ҳамма бир хил эмас. Юришимиз, фикрлашимиз ва хоҳишларимиз ҳар хил. Дунёда айнан бир хил нарсанинг ўзи йўқ.
Табиатдаги баргларни олинг, ҳатто бир дарахтдан тўкилган барглар тўрли хил. Бир хил кўринса-да, улар орасидан айнан бир хил иккита баргни топиш амри маҳол. Буни табиатшунослар яхши билади. Одамларнинг орзу-ўйлари, хоҳиш-истаклари ҳам турлича.
Масалан, Болтавой қизил рангли автомашинаси, шаҳар кафтдек кўриниши учун тўққизинчи қаватдан уйи бўлишини орзу қилади. Кимдир денгиз бўйлаб саёҳат қилишни, кимдир ойга учишни истаса, яна кимдир ҳаракатсиз оёқларига қараб туриб, юриб кетишни Яратгандан сўрайди. Яна кимгадир фарзандлари саломат бўлса бас. Демак, оламда ҳамманинг орзулари бўлакча. Бунинг учун амалга ошмайдиган хаёлий воқеаларни эмас, реал бўлиши мумкин бўлган жараён сари интилиш керак.
Олайлик, иш жойингизда ходимлар орасида обрў-эътиборга эришмоқчисиз. Бунинг учун биргина хоҳишнинг ўзи камлик қилади. Махсус дастур босқичлари сизнинг орзунгизга яқинлашишга ёрдам беради. Ишни нимадан бошлаш керак?
Орзунгиз амалга ошиши учун бугундан замин тайёрланг!
Унинг ушалишини бир зумда кўрмайсиз. Чунки реал нарсани орзу қиляпсиз. Тасаввур қилинг, ташқари туман билан қопланган. Сиз уйингизга боряпсиз, манзил аниқ. Уйингиз эса туманда кўринмаяпти, лекин шундай бўлса-да, сиз тўхтамай боряпсиз. Қадамба-қадам унга яқинлашяпсиз. Биринчи уйнинг ғира-шира ташқи кўринишини, аста-секин кириш дарвозасини кўряпсиз. Қарабсизки, уйингизни кўриб турибсиз. Қўл чўзсангиз, қўлингиз етади. Манзилга етиб келдингиз. Орзуга ҳам қалбда ишонч билан ҳаракат қилиш лозим.
Орзуга хурсандчилик ва меҳнат орқали эришилади. Ғам-ташвишлар орзудан узоқлаштиради. Кимнидир қийнаш ёки қаттиқ руҳий азобланиш орқали ҳеч қачон орзунгиз амалга ошмайди. Амалга ошса ҳам сизга татимайди. Ёвузлик билан ушалган орзу андуҳга айланади.
Фарангиз ДЎСТМУРОДОВА,
Самарқанд шаҳридаги 43-ихтисослаштирилган умумтаълим мактаби директорининг маънавий-маърифий ишлари бўйича ўринбосари.
