Ўзбекистонда мактаб ўқувчилари орасида тамаки маҳсулотлари истеъмоли тарқалганлиги ўрганилади

Ҳисоб-китобларга кўра, 13-15 ёшдаги мактаб ўқувчиларининг тахминан 1,7 фоизи тамаки чекишни бошлаган, камида бир марта чекишни синаб кўрган ўсмирлар сони эса 7,7 фоизни ташкил қилади.

Ўзбекистон аҳолиси орасида халқаро қабул қилинган стандарт методология асосида кенг кўламли тадқиқотлар ўтказилади. Бу «Аҳоли саломатлиги-2030» миллий стратегиясининг 2024-2026 йилларга мўлжалланган амалий тадбирлар режасида белгиланган.

Унга кўра, республикада HBSC текшируви ўтказилади. Унда мактаб ёшидаги болалар орасида саломатлик соҳасида феъл-атвор ўрганилади.

Шунингдек, GYTS текшируви ташкиллаштирилади. У мактаб ўқувчилари орасида тамаки маҳсулотларини истеъмол қилишнинг тарқалганлигини ўрганишга қаратилган.

Бундан ташқари, STEPS текшируви ўтказиш ҳам мўлжалланган. У катта ёшдаги аҳоли орасида юқумли бўлмаган касалликлар хавфли омилларининг тарқалганлигини ўрганишни назарда тутади.

Анемия (темир моддаси, В12 витамини етишмаслиги), ёд етишмаслиги, фолий кислотаси ва А витамини етишмаслигининг тарқалганлиги ва сабабларини ўрганиш ҳам режалаштирилмоқда.

Режада аҳоли томонидан туз истеъмол қилиш даражасини ўрганиш ҳам белгиланган.