Озодбек Назарбеков: “Олий таълим муассасалари ректорлари билан ҳамкорликни бошлаймиз”
Олий ва ўрта махсус таълим вазири Абдуқодир Тошқулов ҳамда Маданият вазири Озодбек Назарбеков Самарқанд давлат университетида вилоятдаги олий таълим муассасалари ректор ҳамда проректорлари билан учрашди.
– Таълим соҳасидаги бугунги муаммолар ва уларнинг ечими, талабалар учун яратилаётган шароитлар, ёшларнинг замонавий билимларни эгаллашида қўлланилаётган таълим усуллари ҳақида олий таълим муассасалари раҳбарлари билан фикр алмашдик, – деди Маданият вазири Озодбек Назарбеков. – Талабаларнинг бўш вақтларини мазмунли ўтишини таъминлаш ва ёшларни санъат ва маданиятга кенг жалб этиш мақсадида ҳамкорликда лойиҳалар яратиш тўғрисида келишувга эришдик. Келгусида олий таълим муассасалари ректорлари билан ҳамкорликда ишлаймиз, яъни олий таълим даргоҳларида бадиий ҳаваскорлик ансамбллари ташкил этамиз ва ёшларни турли маданий тадбирлар ўтказишда фаол иштирокини таъминлаймиз.
Учрашув давомида яна бир қатор масалалар бўйича таклифлар ўрганиб чиқилди.
Наврўз Шодмонқулов.
