"Пропан-метан заправка"да юз берган ёнғин уч соатдан ортиқ вақтда бартараф этилди

Жорий йилнинг 2 июнь куни тахминан соат 11:37 да Қорақалпоғистон Республикаси Беруний тумани, Беруний кўчасида жойлашган “Икром Азиз” МЧЖга қарашли универсал (пропан-метан-солярка) ёқилғи қуйиш шаҳобчасида ёнғин содир бўлган.

Бирламчи маълумотларга кўра, ёнғин натижасида ер устида жойлашган 25 тонналик 2 та сиғим ва 2 та “ЗИЛ-130” ёқилғи ташиш автомашиналари ёнган. Бундан ташқари, ушбу сиғимлар ёнида 10 тонналик 3 та бўш, тахминан 30-50 тонналик 2 та сиғим жойлашган.

Мазкур ҳолат юзасидан воқеа жойига Қорақалпоғистон Республикаси фавқулодда вазиятлар бошқармасининг 6 та ёнғин-қутқарув гуруҳи етиб борган.

Ҳозирча келиб чиққан ёнғиннинг сабаби ёқилғини қуйишда хавфсизлик қоидаларига риоя этмаслик, деб тахмин қилинмоқда.

ФВВ матбуот хизмати хабарига кўра, ёнғин соат 14:05 тўлиқ ўчирилган.

Жабрланган ва ҳалок бўлган фуқаролар тўғрисида хабар келиб тушмаган.