Қатағон қурбонлари ёд этилди
Самарқанд вилояти Қатағон қурбонлари хотираси музейида Шаҳидлар хотираси куни муносабати билан “Инсон – азиз, хотира – муқаддас” мавзуида маданий-маърифий тадбир ўтказилди.
“Маҳалла” хайрия жамоат фонди вилоят бўлими ташаббуси билан Қатағон қурбонлари хотираси музейи ҳамда “Миллий тикланиш” демократик партияси вилоят кенгаши ҳамкорлигида ташкил этилган тадбирда зиёлилар, қатағон қурбонларининг яқинлари иштирок этди.
– Ҳозирги кунга қадар вилоятимизда 4153 нафар қатағон қурбонлари аниқланган бўлиб, улар ҳақидаги маълумотлар жамланга ҳолда китоб тайёрланмоқда, – дейди Самарқанд вилоят Қатағон қурбонлари хотираси музейи раҳбари М.Муқимов. – Бугунги кунда ҳам бу борада давлатимиз раҳбарининг 2020 йил 8 октябрдаги “Қатағон қурбонларининг меросини янада чуқур ўрганиш ва улар хотирасини абадийлаштиришга доир қўшимча чора-тадбирлар тўғрисида”ги Фармойиши асосида амалий ишлар давом этмоқда. Янги маълумотлар, фактлар тўпланмоқда.
Тадбирда 20 нафар қатағон қурбонларининг авлодларига ташкилотчилар томонидан эсдалик совғалари топширилди.
