Самарқандда декабрь ойида “Конституцияни ўрганамиз ва унга амал қиламиз!” шиори остида ойлик эълон қилинди

Бугун ўтказилган ҳокимлик соатида вилоят ҳокими Э.Турдимов ана шундай таклифни билдирди.

Ойлик давомида жойларда аҳолининг барча қатламлари ўртасида Бош қомусимиз мазмун-моҳияти юзасидан давра суҳбатлари, учрашувлар ва маънавий тадбирлар уюштирилади. Бу ишга адлия, маданият бошқармалари, маънавиятчилар, ижодкорлар ва тажрибали ҳуқуқшунослар жалб этилади.

Умумтаълим мактаблари, академик лицейлар, касб-ҳунар таълими муассасалари ва олий ўқув юртлари ўқувчи ва талабалари ўртасида “Конституция билимдони” кўрик-танлови ўтказилади.

Танлов ғолиблари ойлик якунига кўра, вилоят ҳокимлиги томонидан рағбатлантирилади. Шунингдек, ғолиблар учун Ўзбекистон Республикаси Олий Мажлиси Сенати ва Қонунчилик палатасига саёҳат уюштириш ҳам кўзда тутилган.