Самарқандда "СOVID-19" га қарши курашишда ишлатиладиган дори воситасини қиммат нархда пуллаган шахс қўлга олинди

Ҳолат Бош прокуратура ҳузуридаги Департаментнинг Самарқанд шаҳар бўлими томонидан ўтказилган тезкор тадбирда фош этилган. Унда Пайариқ туманида яшовчи Д.Ш. дорихонадаги чакана сотиш нархи 400 минг сўм бўлган “Соvid-19” касаллигига қарши курашишда фойдаланиладиган “Bemsivir” (Remdesivir) 100 mg” дори воситасини қиммат нархда сотган вақтда ушланган.

У дори воситасининг ҳар бир донасини ноқонуний равишда 950 минг сўмдан, жами 5 дона “Bemsivir” (Remdesivir) 100 mg”ни 4 миллион 750 минг сўмга пуллаган.

Тадбирда умумий қиймати 18 миллион сўмлик 19 қути “Bemsivir (Remdesivir) 100 mg”, 17 қути “Бревикс”, 1 қути “Панарас”, 1 қути “Климон” дори воситаси, “Кундалик” ҳисоб-китоб дафтари ҳамда 85,3 миллион сўм ва 500 АҚШ доллари миқдоридаги пул далилий ашё сифатида олинган.

Аниқланган ҳолат юзасидан терговга қадар текширув ҳаракатлари олиб борилмоқда.