Samarqanddagi 62 ming gektardan ziyod maydon defoliatsiya qilinadi
Joriy yilning 5-15 sentyabr kunlari 359 ta OVX purkagichlar yordamida Samarqand viloyatidagi 62 ming 687 gektar g‘o‘za maydoni defoliatsiya qilinadi. Rejaga ko‘ra, kuniga 8 ming gektar maydon defoliatsiya qilinishi belgilangan. Shu maqsadda 193 ta otryad tashkil etilib, mavsumda 1155 nafar qishloq xo‘jaligi xodimlari va mexanizatorlar ishtirok etmoqda.
Bu yilgi g‘o‘za defoliatsiyasi uchun jami 16 ming 100 kilogramm xorijda ishlab chiqarilgan “Xim-ekstra”, ”D-ekstra”, ”Reglon super”, ”Yannchar ultra”, ”DEF” defoliantlaridan foydalanilmoqda.
Defoliatsiyada qatnashadigan ishchilar, OVX mexanizatorlari yoki ishchi eritma tayyorlash agregatlar haydovchilarining mehnat muhofazasi va texnika xavfsizligini ta’minlash bo‘yicha aniq tadbirlar rejasi mavjud. Tijorat banklari tomonidan defoliantlar va boshqa xizmatlar uchun pul mablag‘lari talabnoma asosida o‘z vaqtida to‘lanishi yuzasidan dastur ishlab chiqilgan.
Mazkur tadbirlarning o‘z vaqtida va sifatli ijro etilishi yuzasidan inspeksiya organlari tomonidan doimiy monitoring-o‘rganish tadbirlari o‘tkaziladi.
