Хантавирус сабаб бир нечта давлатлар карантин чораларини кучайтирди
Дунё бўйлаб хантавирус тарқалаётгани ҳақида хабарлар кўпаймоқда. Hondius лайнерида бошланган вирус ҳозир самолётлар орқали ҳам бошқа давлатларга етиб бораётгани айтилмоқда.
Хусусан, Франция, Германия ва Польшада карантин чоралари кучайтирилди, айрим йўловчилар изоляцияга олинган.
Hondius круиз лайнери 1 апрель куни Аргентинадан Антарктида томон саёҳатга чиққан эди. Саёҳат давомида лайнерда хантавирус тарқалиши аниқланди. Биринчи ўлим 11 апрель куни тўғридан-тўғри кема бортида қайд этилган. Кейинчалик яна бир кекса аёл вафот этди. Учинчи ўлим эса 2 май куни яна лайнер бортида содир бўлган.
Камида саккиз кишида касаллик белгилари тасдиқланган. Мутахассислар вируснинг Андес тури аниқланганини айтмоқда. Бу тур жуда кам учрайди ва одамдан одамга фақат жуда яқин мулоқотда юқиши мумкин.
10 май куни лайнер Испаниянинг Тенерифе оролига етиб келган. Шу вақтга қадар йўловчилар бир неча кун давомида кемада карантинда ушлаб турилган. Кейин эвакуация ишлари бошланди. Франция, Германия ва бошқа давлатлар ўз фуқароларини махсус рейслар билан олиб чиқди.
Тенерифедан учиб кетган Франция ва АҚШ йўловчиларида ҳам вирус аломатлари кузатилган. Германия ва Польша йўловчилари ҳам карантинга олинган.
Жаҳон соғлиқни сақлаш ташкилоти ҳозирча оммавий пандемия хавфи йўқлигини айтмоқда. Хантавирус одатда кемирувчилар орқали юқади ва кўп ҳолларда одамдан одамга ўтмайди. Касаллик иситма, ўпка, юрак ва буйрак билан боғлиқ оғир асоратларни келтириб чиқариши мумкин.
