Херсонни бериш – Россия учун энг катта мағлубиятми?
Россия Днепрнинг ўнг қирғоғидан қўшинларини олиб чиқади. Шу билан Москва Херсон устидан назоратни йўқотиши мумкин. Қўшинларни ўтказиш тўғрисидаги буйруқ чоршанба куни Россия мудофаа вазири Сергей Шойгу томонидан қўшма гуруҳ қўмондони Сергей Суровикиннинг ҳисоботидан сўнг берилди.
Ҳисоботда Суровикин "мавжуд вазиятни ҳар томонлама баҳолашдан сўнг, Днепр дарёсининг чап қирғоғи бўйлаб мудофаага киришиш таклиф қилинганини" таъкидлаб, бу "жуда оғир қарор" эканлигини қўшимча қилди. Вазир Шойгу бу таклифга рози бўлган.
"Биз учун россиялик ҳарбийларнинг ҳаёти ва саломатлиги доимо устувор. Тинч аҳолига таҳдидни ҳам ҳисобга олишимиз керак. Барча тинч аҳоли чиқиб кетишига ишонч ҳосил қилинг. Днепр дарёсидан шахсий таркиб, қуроллар хавфсиз ўтишини таъминлаш учун барча чораларни кўринг, қўшинларни олиб чиқишни давом эттиринг", деди Шойгу.
Бироқ Украина раҳбарияти Россия армияси Днепрни тарк этишига ишонмаяпти.
"Ҳаракатлар айтилгандан кўра баландроқ чиқяпти. Украина Россия Херсонни жангсиз тарк этаётганидан дарак бермаяпти. Россия гуруҳининг салмоқли қисми шаҳарда қолмоқда, минтақага қўшимча захиралар жалб қилинмоқда", - деб ёзади Twitterда Украина президентининг маслаҳатчиси Михаил Подоляк.
Октябр ойи бошида Украина қўмондонлиги ташаббус (яъни ҳал қилувчи ҳужум учун жой танлаш қобилияти) ва сон устунлигидан фойдаланиб, Россия мудофаасида заиф нуқтани топишга муваффақ бўлди: Днепр бўйлаб зарба берилди. Натижада, кўприкнинг шимолий қисмидаги барча рус қўшинлари янги мудофаа чизиғини яратиш учун чекинишга мажбур бўлди. Украина Қуролли Кучлари янги ҳужум учун қўшимча кучларни йиғишни бошлади. Рус гуруҳи учун вазият ёмонлашишда давом этди.
Чекиниш фронтдаги вазият билан боғлиқ эмас: сўнгги бир ой давомида Днепрнинг ўнг қирғоғида фақат маҳаллий жанглар бормоқда. Россия манбалари уларни "Украина ҳужумлари" деб аташади ("далил" сифатида руслар бир нечта шикастланган Украина ускуналарини кўрсатган), аммо Украина фаолликни инкор этди. Қандай бўлмасин, икки томон ҳам бир неча ойдан бери бу ҳудудда жиддий силжишга эриша олмади. Бу эса айрим экспертларга кўра, томонларни яна бир бор музокаралар ҳақда ўйлаб кўришга ундаши мумкин.
