Яхшиларнинг ёрдами Кумушнинг юрагига далда бўлди
Пахтачилик М.Рустамова вилоят ҳокимининг сайёр қабулларидан бирида унга ёрдам беришини сўраганди. Мурожаат асосида Zarnews.uz сайтида М.Рустамованинг қизи Кумушга ёрдам сўраб, саховатпеша одамларга мурожаат қилинганди. Яқинда ушбу оиладан мактуб келди.
«Барча яхши инсонларга чин дилдан раҳмат айтаман! Шу йилнинг март ойида қизимнинг операциясига ёрдам сўраб мурожаат қилгандим. Мурожаатимдан сўнг саховатпеша инсонлар қараб турмади. Қизимнинг операцияси учун пластик картамга мен танимаган, билмаган саховатли инсонлардан пул келиб тушди. Шунингдек, тумандошларимиз ҳам қизимнинг саломатлигига бефарқ қараб туришгани йўқ. Туман ҳокими М.Ҳамдамов, саховатпеша инсон Санжар Собировга оиламиз номидан алоҳида миннатдорчилик билдирамиз.
Айни пайтда қизимда операция муваффақиятли ўтказилди. Ҳозир унинг аҳволи шукур, яхши. Ҳамма эзгу ниятли кишиларнинг орзулари ижобат бўлсин. Дунёда яхши инсонларнинг борлигини, кўплигини ўз ҳаётимизда ҳис қилдик. Шундай инсонлар кўпайсин, уларнинг ўзлари, оила аъзоларига узоқ-умр, саодатли умр тилайман!».
