Зеленскийнинг Трамп вакиллари билан учрашуви давом этмоқда, у келишув таклиф қилди

Кеча Берлин шаҳрида Украина президенти Владимир Зеленский АҚШ вакиллари — АҚШ президенти Дональд Трампнинг махсус элчиси Стив Уиткофф ҳамда Трампнинг куёви Жаред Кушнер билан учрашув ўтказди.

Учрашувнинг асосий мавзуси АҚШ томонидан таклиф этилган тинчлик режаси бўлди. Ғарб оммавий ахборот воситаларининг ёзишича, томонлар Киевнинг Вашингтон таклифларига жавобини муҳокама қилган. Хусусан, The New York Times нашрига кўра, Украина ўз жавобида мамлакат шарқида, айни пайтда Украина Қуролли кучлари назоратида бўлган ҳудудлар устидан назорат сақлаб қолишни талаб қилган.

Украина томонидан музокараларда Миллий хавфсизлик ва мудофаа кенгаши котиби Рустем Умеров ҳам иштирок этган.

Шунингдек, Германия канцлери Фридрих Мерц ҳам ҳозир бўлган. Немис нашрларининг маълум қилишича, у қутлов сўзларидан сўнг музокараларни тарк этган. Вазирлар маҳкамаси йиғилишлар залида бўлиб ўтган учрашувда модератор сифатида канцлернинг ташқи сиёсат ва хавфсизлик бўйича маслаҳатчиси Гюнтер Заутер қолган.

Берлинда АҚШ ва Украина ўртасидаги музокаралар беш соатдан ортиқ давом этгани хабар қилинди. Учрашув чоғида Украина президенти Ғарб томонидан хавфсизлик кафолатлари берилиши эвазига НАТОга аъзо бўлиш курсидан воз кечишни таклиф қилди. Гап таслим бўлиш ёки «кескин бурилиш» ҳақида эмас, балки агар Альянс Украинага реал ҳимоя беришга тайёр бўлмаса, НАТОга муқобил вариантни топишга уриниш ҳақида кетмоқда.

Украина ва АҚШ делегациялари ўртасидаги тинчлик музокаралари бугун Берлинда давом эттирилади. Бошқа таклифлар мазмуни ҳозирча ошкор этилмаяпти.