1 iyunda “Yoshlik” istirohat bog‘i kimlarga bepul xizmat ko‘rsatadi?
- Istirohat bog‘imizdagi ellikdan ortiq attraksionimizga yaqinda yana beshtasi qo‘shildi, - deydi istirohat bog‘i rahbari Farhod Jalilov. – Doimiy ravishda nogironlarga, mehribonlik uyi tarbiyalanuvchilariga bepul xizmat ko‘rsatib kelmoqdamiz. 1 iyun kuni soat 9:00 dan 12:00 gacha kam ta’minlangan oila farzandlari uchun ham barcha attraksionlarimiz bepul bo‘ladi. Kam ta’minlangan oilalar ro‘yxatini «Mahalla» xayriya jamoat fondi viloyat bo‘limi tashkil qilib beradi va o‘zlari nazoratga oladi. Bog‘imiz ma’naviy-madaniy va sport maydoni hamdir.
Bu yilgi mavsum davomida bog‘ o‘rtasida joylashgan 600 o‘ringa mo‘ljallangan sahnada qo‘g‘irchoq teatri haftada bir marta spektakl namoyish etadi.
Bundan tashqari, bu yil ilk marta «O‘zbekkino» milliy agentligi viloyat bo‘limi bilan shartnoma asosida katta va kichik yoshdagilar uchun kino tomoshalari tashkil etiladi.
Husan ELTOYeV.
