Endi dori vositalari samarasizligi aniqlansa, amaliyotga qo‘llanmaydi
Sog‘liqni saqlash vazirining “Farmakologik vositalar hamda dori vositalarining klinik tadqiqotlarini o‘tkazish tartibi to‘g‘risidagi nizomni tasdiqlash haqida”gi buyrug‘i Adliya vazirligi ro‘yxatidan o‘tkazildi.
Hujjatga muvofiq, farmakologik vositalar hamda ayrim toifadagi dori vositalari faqat klinik tadqiqotlarning ijobiy natijalari asosida tibbiyot amaliyotida qo‘llash uchun ruxsat etiladi.
Shu bilan birga, xavfsizligi va samaradorligi ilgari isbotlangan, Jahon sog‘liqni saqlash tashkiloti tomonidan qayta malakalangan yoki bioekvivalentligi tan olingan dori vositalari uchun klinik tadqiqot o‘tkazish talabi qo‘yilmaydi.
Mazkur yondashuv ilmiy asoslangan nazoratni kuchaytirish bilan bir qatorda, ishlab chiqaruvchilar va import qiluvchilar uchun ortiqcha byurokratik to‘siqlarni kamaytirishga xizmat qiladi.
Klinik tadqiqotlar faqat Sog‘liqni saqlash vazirligi tomonidan belgilangan klinik bazalarda, “Yaxshi klinik amaliyot” (GCP) standartlariga qat’iy rioya qilingan holda amalga oshiriladi.
Bu jarayonda nojo‘ya ta’sirlar va asoratlar qat’iy nazorat ostida bo‘ladi. Agar dori vositasi bemor hayoti va sog‘lig‘iga xavf tug‘dirsa yoki klinik jihatdan samarasizligi aniqlansa, klinik tadqiqot belgilangan tartibda to‘xtatiladi.
Qisqa qilib aytganda, mazkur nizom dori vositalarini ilmiy asosda baholash, bemorlar huquqlarini ishonchli himoyalash hamda davlat nazoratining shaffof va samarali mexanizmlarini ta’minlashga xizmat qiladi.
Sog‘liqni saqlash vazirligi axborot xizmati.
