Afg‘oniston: masjid portlashi oqibatida 20 dan ortiq kishi halok bo‘ldi
Kobuldagi masjidda yuz bergan portlashda kamida 21 kishi halok bo‘ldi. Ular orasida mashhur musulmon ulamosi ham bor. Kamida 33 nafar afg‘on yaralangan, deya xabar bermoqda Associated Press politsiya va voqea guvohiga tayanib. Yaralanganlar orasida bir qancha bolalar ham bor.
Terakt dunyoning ko‘plab mamlakatlarida terrorchi deb tan olingan Tolibon radikal harakati Afg‘onistonda hukumatni qo‘lga kiritganiga bir yil to‘lganida sodir bo‘ldi.
Hozircha hech bir islomiy qurolli guruh portlash uchun javobgarlikni o‘z zimmasiga olgani yo‘q.
Tolibon matbuot kotibi Zabihulloh Mujohid hukumat sunniy masjidga uyushtirilgan hujumni qoralab, jinoyatchilar qo‘lga olinib, “dahshatli qilmishlari” uchun jazolanishini qo‘shimcha qildi.
