Andijonda atrof-muhitga zarar yetkazgan sement ishlab chiqaruvchi korxona faoliyati vaqtincha to‘xtatildi

Andijon viloyatida “Sing Lida” MChJ qo‘shma korxonasining faoliyati to‘xtatildi. Bu haqda Davlat ekologiya qo‘mitasi xabar qildi.

Ta’kidlanishicha, qo‘mita Andijon viloyati, Asaka tumanida joylashgan “Sing Lida” MChJ QK faoliyatida tabiatni muhofaza qilish va tabiiy resurslardan oqilona foydalanishga oid qonun va me’yoriy-huquqiy hujjatlar talablari ijrosining ta’minlanishi yuzasidan tekshirish o‘tkazgan.

Tekshirish davrida sement changini ushlash qurilmasining samaradorligi 53,1 foiz (loyiha bo‘yicha 99,9 foiz), 2-manbadagi chang ushlash qurilmasining samaradorligi 60,7 foiz (loyiha bo‘yicha 99,9 foiz)ni tashkil etib, changlarni ushlab qolish samaradorligi past darajada ekanligi aniqlandi.

Shu bois aniqlangan kamchiliklarni tezkorlik bilan bartaraf etish, atmosfera havosiga tashlanadigan ifloslantiruvchi moddalarni kamaytirish maqsadida bugungi kunda ekologik talablarga javob bermaydigan holatda ishlab turgan klinker tayyorlash pechi va sement tayyorlash tegirmoni uskunalarining faoliyati vaqtincha to‘xtatilib, bajarilishi majburiy bo‘lgan ko‘rsatmalar berilgan.