Bemorning qarindoshi shifokorga tajovuz qilib, uni ko‘zidan ayirdi
Namangan viloyati Uchqo‘rg‘on tumani shoshilinch tibbiy yordam bo‘limi jarrohi O.Qo‘ldoshevga bemorning tog‘asi tomonidan tajovuz qilinib, tiklanib bo‘lmas jarohat yetkazildi. Sog‘liqni saqlash vazirligi tomonidan ushbu vaziyat atroflicha o‘rganildi. Bu haqda vazirlik matbuot xizmati ma’lum qildi.
Dastlabki ma’lumotlarga qaraganda, 2020 yil 2 yanvar kuni 18.30 larda Namangan viloyati Uchqo‘rg‘on tumani shoshilinch tibbiy yordam bo‘limi bolalar bo‘limiga ambulator murojaat qilgan bemorga zudlik bilan vaqtida yordam ko‘rsatilgan. Bemor bolaning tog‘asi, Farovon MFYda yashovchi, 1990 yil tug‘ilgan B.T. muolaja xonasi oldida janjal ko‘tarib turgan paytda tuman shoshilinch tibbiy yordam bo‘limi bolalar bo‘limi navbatchi jarrohi, 1960 yil tug‘ilgan O.Qo‘doshev borgan. Shundan so‘ng u B.T.ni qo‘lidan yetaklab, tinchlantirishga harakat qilib, zina oldidagi eshikka olib borgan va tashqariga chiqarib, eshikni yopgan. Vrach orqaga qaytayotgan paytda B.T. eshikni tepib buzib, ichkariga kirgan va navbatchi jarrohga qo‘qqisdan o‘ng ko‘zi sohasiga kuchli zarba bergan.
Oqibatda O.Qo‘ldashevning o‘ng ko‘z olmasini posttravmatik yorilishi kuzatilgan. Voqea paytida terapiya bo‘limi navbatchi hamshiralari va xirurgiya post navbatchi hamshirasi o‘sha yerda bo‘lgan. Shundan so‘ng navbatchi vrachga tan jarohati yetkazgan B.T. voqea joyidan qochgan. Yolg‘iz qolgan jabrlanuvchiga terapiya bo‘limida davolanayotgan bemor D.I. qonayotgan sohaga paxta qo‘yib yordam ko‘rsatgan. Bo‘lim navbatchi farroshi reanimatsiya bo‘limidagi navbatchi vrachlarni chaqirgan.
Jabrlanuvchi bog‘lov xonasiga olib kirilgan va shoshilinch ravishda okulist Z.Valiyev chaqirilgan hamda “102” navbatchilik qismiga xabar berilgan. Okulist tomonidan bemor ko‘rilgan va birlamchi tibbiy yordam berilib, tez yordam aviatsiyaga xabar berilgan. Bemor zudlik bilan Respublika shoshilinch tez tibbiy yordam ilmiy markazi Namangan filialiga yetkazilgan. Bu yerda shifokorlar tomonidan zudlik bilan tekshiruvdan o‘tkazilib, “Yopiq kalla bosh miya jarohati. O‘ng ko‘z olmasining travmatik katta yorilishi, ko‘z gavharining chiqishi” dastlabki tashxisi bilan yotqizilgan. Va, shu kunning o‘zida Sog‘liqni saqlash vazirligi tomonidan viloyatga tajribali mutaxassislar yuborilgan.
Joriy yil 3 yanvar tongda, soat 05.00 da shoshilinch ravishda Respublika ixtisoslashtirilgan ko‘z kasalliklari shifoxonasi bo‘lim boshlig‘i Muhabbat Ibragimova va bo‘lim shifokori Asqar Husanov tomonidan bemordagi o‘ng ko‘z olmasi shakli buzilishi va yumshoq to‘qimalar shikastlanishiga birlamchi murakkab xirurgik ishlov berish operatsiyasi o‘tkazilgan.
Ayni paytda tajribali shifokorlar tomonidan bemorga malakali tibbiy yordam ko‘rsatilmoqda. Biroq jabrlanuvchi shifokorning ko‘zi qayta tiklanmaydigan darajada ko‘rish qobiliyatini yo‘qotgan.
