“Besh tashabbus olimpiadasi”: Paxtachilik yoshlar viloyatda yetakchi, respublikada umumjamoa hisobida 8-o‘rindamiz
Joriy yilning 1 martidan boshlab yoshlarning bo‘sh vaqtini mazmunli tashkil etish va iste’dodli yoshlarni kashf qilish maqsadida “Besh tashabbus olimpiadasi” doirasida turli yo‘nalishlarda tanlov va musobaqalar bo‘lib o‘tmoqda.
Jumladan, madaniyat va san’at yo‘nalishida “Bo‘zatov yoshlar ovozi” va “Yosh musavvir”, sport yo‘nalishida yengil atletika, stol tennisi, workout, mini futbol, futbol, armrestling, voleybol, stritbol, kurash, shashka, shaxmat, gimnastrada va “Besh tashabbus paralimpiadasi” o‘tkazilmoqda.
Shuningdek, kompyuter texnologiyalari va IT yo‘nalishida kibersport, kitobxonlik va intellektual o‘yinlar yo‘nalishida “Yosh kitobxon”, “Yosh kitobxon oila”, “Mushoira”, “Zakovat”, “Ibrat” chet tillari, kasblar tanlovi yo‘nalishida novvoylik, yosh quruvchi, dizaynerlik, elektromontaj ustasi va payvand ustasi kabi tanlov va sport musobaqalari tashkil etilyapti.
Hozirgi kunga qadar musobaqaning to‘rtinchi viloyat bosqichida 16 ta tuman (shahar) yoshlari 65 ta oltin, 65 ta kumush, 67 ta bronza, jami 204 ta medalni qo‘lga kiritgan. Tumanlar kesimida paxtachilik yoshlar 28 ta medal bilan bu yil ham viloyatda yetakchilik qilmoqda. Aytish joizki, tuman yoshlari o‘tgan yilgi musobaqalarda 208 ta tuman (shahar) orasida eng yaxshi natija qayd etib, respublikada birinchi o‘rinni egallagan edi. Tumandagi 7 ta mahalla yoshlari musobaqalarning respublika bosqichida 6 ta oltin va 2 ta kumush medal bilan 22 ball to‘plagan.
“Besh tashabbus olimpiadasi” doirasida bugungi kunga qadar sportning yengil atletika, stol tennisi, shashka, vorkaut, futbol, mini futbol turlari hamda imkoniyati cheklangan va nogironligi bo‘lgan yoshlar o‘rtasida bo‘lib o‘tgan A, B, S ligalarning respublika musobaqalarida viloyatimiz jamoalari 4 ta oltin, 4 ta kumush va 9 ta bronza, jami 16 ta medalni qo‘lga kiritdi. Bu ko‘rsatkich bo‘yicha hozircha viloyat yoshlari respublikda sakkizinchi o‘rinda bormoqda, bu borada Paxtachi tumani sportchilari viloyatimizda peshqadam. Musobaqalarning final bellashuvlari davom etyapti.
