Boshqa viloyatlarga samolyotda boramiz
Qayd qilingan ish Transport vazirligi tomonidan "Uzbekistan airways" AJ va "Uzbekistan airports" AJ bilan birgalikda amalga oshiriladi. Jumladan, Buxoro, Urganch, Termiz, Namangan va Farg‘ona shaharlariga parvozlar tashkil qilinadi.
Bunda aviaqatnovlar qulay (ertalabki va kechki) jadval asosida amalga oshiriladi.
Ushbu yangilik davlat rahbarining "Samarqand viloyatida investitsiya va tadbirkorlik muhitini yanada rivojlantirish hamda aholi turmush darajasini yaxshilash chora-tadbirlari to‘g‘risida"gi qarorida qayd qilingan.
Eski hovlilar o‘rnida zamonaviy binolar bo‘ladi
Davlat rahbari imzolagan hujjat bilan tanisharkansiz shahar infratuzilmasi yaxshilanishi barobarida aholining turmush farovonligini oshirishga alohida e’tibor qaratilganiga guvoh bo‘lasiz. Zotan, yangi ish o‘rinlari yoshlar va malakali mutaxassislar uchun qo‘shimcha imkoniyatlar yaratib, iqtisodiyotni yanada rivojlantirishi, shubhasiz.
Darvoqe, ko‘hna kentning Matonat, Mehnat, Maysazor, Temiryo‘lchilar, Ipak yo‘li, Baraka, Nurafshon, Nafosat, Sadaf hamda Bag‘dod mahallalaridagi jismonan va ma’nan eskirgan, avariya holatidagi 2 ming 878 ta bir va ikki qavatli uylar o‘rnida renovatsiya dasturi asosida ko‘p qavatli zamonaviy uylar quriladi. Yangi turar joylar aholining yashash sharoitlarini sezilarli darajada yaxshilash bilan birga, zamonaviy arxitektura va qulayliklarni birlashtirgan muhit yaratadi.
Qorasuv massivida 600 ta yangi ish o‘rni yaratiladi
Buning uchun qiymati 1 trillion so‘mga teng loyihalar amalga oshiriladi. Xususan, 89 gektar yer maydonida 16 ta ko‘p qavatli turar joy majmuasi, 1 ta ijtimoiy hamda 24 ta savdo va xizmat ko‘rsatish ob’yektlari barpo etiladi.
Bundan tashqari, ushbu maskanda Zarafshon daryosi bo‘yidagi 116 gektar yer maydonida aholi hordiq chiqarishi va sayr qilishi uchun barcha sharoitlarga ega "Yangi O‘zbekiston" bog‘i barpo etiladi.
Yil yakunigacha Qorasuv massivining 3,7 kilometr ichki yo‘llari joriy ta’mirlanadi. Bu o‘zgarishlar transport qatnovining yaxshilanishi hamda piyodalar uchun xavfsiz, qulay sharoit yaratilishiga xizmat qilishi shubhasiz.
Investitsion jozibadorlik ortyapti
Yangi infratuzilmalar va qulay shart-sharoit aholining kundalik hayotini yaxshilash barobarida sayyohlar, jumladan, investorlarda hududga katta qiziqish uyg‘otmoqda.
Misol uchun, Samarqand shahrida yana bir kardiologiya klinikasi ish boshlashi belgilangan. Prezident imzolagan qarorda ushbu loyihaga Buyuk britaniyalik Tayman Vaxid va Muhammad Sher investitsiya kiritayotgani ko‘rsatilgan.
Bundan tashqari, 2025 yilda irlandiyalik investor "ALC Blarney Aircraft Limitee"ning havo transportida yo‘lovchi tashish xizmatlarini tashkil etishni rejalashtiryapti.
Yo.Marqayev tayyorladi.
